കതിരൂര് മനോജ് വധക്കേസില് സിപിഎം കണ്ണൂര് ജില്ലാ സെക്രട്ടറി പി. ജയരാജനെതിരെ സിബിഐ സമര്പ്പിച്ച അനുബന്ധ കുറ്റപത്രത്തില് യുഎപിഎ(The Unlawful Activities (Prevention) Act- 1967)-വകുപ്പുകള് ഉള്പ്പെടുത്തിയതിനെതിരെ സിപിഎം പ്രതിഷേധം പ്രകടിപ്പിച്ചിരിക്കുന്നു.
യുഎപിഎയുടെ 15-ാം വകുപ്പനുസരിച്ച് രാജ്യത്തിന്റെ ഐക്യം, അഖണ്ഡത, സുരക്ഷ (സാമ്പത്തികസുരക്ഷയുള്പ്പെടെ), പരമാധികാരം ഇവയ്ക്ക് ഭീഷണിയുയര്ത്തുന്ന നടപടികള്ക്കൊപ്പം ജനങ്ങളില് പൊതുവായോ ഏതെങ്കിലും വിഭാഗം ജനങ്ങള്ക്ക് പ്രത്യേകമായോ ഭയപ്പാടുണ്ടാക്കുന്ന കൊലപാതകങ്ങളും ആക്രമണങ്ങളും ഭീകരപ്രവര്ത്തനമായി കണക്കാക്കണം. അത്തരം ഭീകരപ്രവര്തനങ്ങള് നടത്താന് ഗൂഢാലോചന നടത്തുകയോ പ്രേരിപ്പിക്കുകയോ ഉപദേശം നല്കുകയോ ഭീകരപ്രവര്ത്തനത്തെ ന്യായീകരിക്കുകയോ സഹായിക്കുകയോ ചെയ്യുന്നത് നിയമത്തിന്റെ 18-ാം വകുപ്പനുസരിച്ച് അഞ്ച് വര്ഷത്തില് കുറയാത്തതും, ജീവപര്യന്തം വരെയാകാവുന്നതുമായ തടവുശിക്ഷയും പിഴയും ചുമത്തപ്പെടാവുന്ന കുറ്റമാണ്.
ജയരാജനെതിരെ സമര്പ്പിച്ച അനുബന്ധ കുറ്റപത്രത്തില് ഈ വകുപ്പുള്പ്പെടുത്തിക്കൊണ്ട് ആസൂത്രിതമായി നടത്തിയതും, ജനങ്ങളില്, പ്രത്യേകിച്ച് ആര്എസ്എസ്-ബിജെപി പ്രവര്ത്തകരിലും അനുഭാവികളിലും ഭീതി പടര്ത്തിയതുമായ രാഷ്ട്രീയ കൊലപാതകം ഭീകരപ്രവര്ത്തനം തന്നെയാണെന്ന് സിബിഐ നിലപാടെടുത്തിരിക്കുന്നു. ഇത് രാഷ്ട്രീയ കൊലപാതകങ്ങള് ആസൂത്രിതമായി നടത്തി ജനങ്ങൡ ഭീതിപടര്ത്തുന്നതിനെതിരെയുള്ള ശക്തമായ ഒരു നീക്കമാണ്.
യുഎപിഎ നിയമത്തിന്റെ 15-ാം വകുപ്പില് പറയുന്ന മാനദണ്ഡങ്ങള്ക്കുള്ളില് വരുന്ന കുറ്റകൃത്യമാണ് കതിരൂര് മനോജ് വധക്കേസില് നടന്നിരിക്കുന്നതെന്ന കാര്യത്തില് സംശയമില്ല. അതുകൊണ്ടുതന്നെ സിബിഐയുടെ നിലപാട് നിയമപരമായി നിലനില്ക്കുന്നതുതന്നെയാണ്. 45-ാം വകുപ്പനുസരിച്ച് കേന്ദ്രസര്ക്കാരിന്റെ അനുമതി കുറ്റപത്രം സമര്പ്പിക്കാന് ആവശ്യമാണ്. അത് ഇപ്പോള് ലഭിച്ചിട്ടില്ലെങ്കില്തന്നെ, സിബിഐയ്ക്ക് കേന്ദ്ര ആഭ്യന്തരവകുപ്പില്നിന്ന് ഉടന്തന്നെ േനടിയെടുക്കാവുന്നതാണ്.
നിയമത്തിന്റെ 35-ാം വകുപ്പനുസരിച്ച് ഭീകരപ്രവര്ത്തനം സംഘടിപ്പിക്കുന്ന സംഘടനകളെ ഭീകരസംഘടനകളുടെ പട്ടികയില്പ്പെടുത്തി അവയുടെ പ്രവര്ത്തനം നിരോധിക്കാന് കേന്ദ്രസര്ക്കാരിന് അധികാരമുണ്ട്. പാര്ട്ടി ജില്ലാ സെക്രട്ടറി ആസൂത്രണം ചെയ്ത് നടത്തിയതെന്ന് സിബിഐ കണ്ടെത്തിയ കൊലപാതകം, ഭീകരപ്രവര്ത്തനംകൂടിയാണെന്ന കുറ്റാരോപണം വിചാരണയ്ക്കുശേഷം കോടതി ശരിവച്ചാല് സിപിഎമ്മിനുണ്ടാകാവുന്നത് കനത്ത തിരിച്ചടിതന്നെയായിരിക്കും.
