കണ്ണൂര്: ജില്ലയിലെ പൊതു വിദ്യാലയങ്ങളില് മികച്ച രീതിയില് ്രപവര്ത്തിക്കുന്നവയുടെ മാതൃകകള് പഠിച്ച് മറ്റ് വിദ്യാലയങ്ങള്ക്കും പകര്ന്നുകൊടുക്കാന് ഡയറ്റ് പദ്ധതി. പല വിദ്യാലയങ്ങളിലും തനത് രീതിയില് നടത്തുന്ന മികച്ച ചില പ്രവര്ത്തനങ്ങള് ഉണ്ടാവുന്നുണ്ടെന്നാണ് ഡയറ്റ് കണ്ടെത്തിയിട്ടുള്ളത്. പലപ്പോഴും പ്രഥമാധ്യാപകരോ മറ്റ് അധ്യാപകരോ നടത്തുന്ന വ്യക്തിപരമായ നേതൃത്വവും ഇടപെടലുമാണ് സ്കൂളുകള്ക്ക് മികവ് നേടിക്കൊടുക്കുന്നത്. ഇത്തരം മികച്ച രീതികള് കണ്ടെത്തി പഠന വിധേയമാക്കുകയാണ് പദ്ധതി ലക്ഷ്യമിടുന്നത്.
ശാസ്ത്രീയ വിശകലനത്തിലൂടെ ഇത്തരം പ്രവര്ത്തനങ്ങളുടെ രീതിശാസ്ത്രം മറ്റ് വിദ്യാലയങ്ങള്ക്കും സ്വീകരിക്കാന് കഴിയുന്ന രീതിയില് തയ്യാറാക്കി നല്കും. സ്കൂള് ഹെഡ്മാസ്റ്റര്മാരുടെ പങ്കിന് പ്രത്യേക ഊന്നല് നല്കിക്കൊണ്ട് മികച്ച രീതികള് പഠന വിധേയമാക്കാനാണ് ഉദ്ദേശിക്കുന്നതെന്ന് ഡയറ്റിന്റെ 2017-18 വര്ഷത്തെ പദ്ധതി വിശദീകരിക്കുന്നു. വിദ്യാര്ഥികളുടെ പഠന നിലവാരം അളക്കുന്നതിനുള്ള തുടര് മൂല്യ നിര്ണയ രീതിക്ക് കൃത്യമായ മാര്ഗ നിര്ദേശം രൂപീകരിക്കാനും പദ്ധതിയുണ്ട്. എസ്എസ്എല്സി പരീക്ഷാ ഫലം അവലോകനം നടത്തി പഠനപ്രക്രിയയുടെ ശക്തി ദൗര്ബല്യങ്ങള് തിരിച്ചറിയാനും പരിഹാര നടപടികള് സ്വീകരിക്കാനുമുള്ള പദ്ധതിയും ഡയറ്റ് മുന്നോട്ടുവെക്കുന്നു.
എല്എസ്എസ് പരീക്ഷയിലെ വിദ്യാര്ഥികളുടെ മികവ് പഠനവിധേയമാക്കുന്നതിനും ലക്ഷ്യമിടുന്നു. കഴിഞ്ഞ വര്ഷം മുതല് എല്എസ്എസ് പരീക്ഷാ പരിശീലനത്തിന് ഡയറ്റ് നടത്തിയ ഇടപെടല് നല്ല ഫലം ചെയ്തുവെന്ന വിലയിരുത്തലിന്റെ അടിസ്ഥാനത്തിലാണിത്.
പരിശീലനങ്ങള്, ട്രൈഔട്ടുകള്, ഗവേഷണ പ്രവര്ത്തനങ്ങള്, സഹായസാമഗ്രികളുടെ നിര്മ്മാണം, തത്സമയ പിന്തുണ എന്നീ അക്കാദമിക് മേഖലകളിലായിരിക്കും 2017-18 വര്ഷത്തെ ഡയറ്റിന്റെ പ്രവര്ത്തനങ്ങള്. ഇതിനായി 24 ലക്ഷം രൂപയാണ് വകയിരുത്തിയിരിക്കുന്നത്.
