ശ്രീനഗര്‍: ജമ്മു കശ്മീരിലെ പുല്‍വാമയിലുണ്ടായ ഭീകരാക്രമണത്തില്‍ എട്ട് സുരക്ഷാ സൈനികര്‍ക്ക് വീരമൃത്യു. സൈന്യം മൂന്നു ഭീകരരെ കൊന്നു. നാല് സിആര്‍പിഫ് സൈനികരും ഒരു പോലീസ് കോണ്‍സ്റ്റബിളും കശ്മീര്‍ പോലീസിലെ മൂന്ന് സ്‌പെഷ്യല്‍ ഓഫീസര്‍മാരുമാണ് വീരമൃത്യു വരിച്ചത്.
ആക്രമണം നടത്തിയ മൂന്നു ഭീകരരെയും സൈന്യം വെടിവച്ചു കൊന്നു. ഇന്നലെ പുലര്‍ച്ചെ നാലരയോടെ പുല്‍വാമയിലെ ജില്ലാ പോലീസ് ആസ്ഥാനത്തെ ജീവനക്കാരുടെ ക്വാര്‍ട്ടേഴ്‌സിനു നേരെയാണ് ആക്രമണമുണ്ടായത്.
മൂന്നു ഭീകരര്‍ വെടിയുതിര്‍ത്ത് ക്വാര്‍ട്ടേഴ്‌സിലേക്ക് കടക്കാന്‍ ശ്രമിക്കുകയായിരുന്നു. ഒരു പോലീസുകാരനും പ്രദേശത്തെ സുരക്ഷാ ചുമതലയുണ്ടായിരുന്ന രണ്ട് സിആര്‍പിഎഫ് ജവാന്മാരും സംഭവസ്ഥലത്തു തന്നെ മരിച്ചു. ഗുരുതരമായി പരിക്കേറ്റ രണ്ടു പോലീസുകാര്‍ പിന്നീട് മരിച്ചു. മേഖലയില്‍ ഇന്റര്‍നെറ്റ് സര്‍വീസുകള്‍ തടഞ്ഞു.
