ന്യൂദല്ഹി: ആദായനികുതി അടയ്ക്കുന്നതിന് ആധാറും പാന് കാര്ഡും തമ്മില് ബന്ധിപ്പിക്കണമെന്ന നിലപാടില് മാറ്റമില്ലെന്ന് യുണീക് ഐഡന്റിഫിക്കേഷന് സ്കീം (യുഐഡി) സിഇഒ അജയ് ഭൂഷണ് പാണ്ഡെ. ഈമാസം 31നു മുന്പ് ആധാര് പാനുമായി ബന്ധിപ്പിച്ചിരിക്കണം.
നിയമത്തിന്റെ അടിസ്ഥാനത്തില് നടപടികള് തുടരും. അതില് മാറ്റമൊന്നുമില്ലെന്നും അജയ് ഭൂഷണ് പറഞ്ഞു. ആധാര് നിയമത്തില് വിശ്വാസമുണ്ടെന്നും വിവരങ്ങള് ചോരില്ലെന്നും അദ്ദേഹം വിശ്വാസം പ്രകടിപ്പിച്ചു. ആധാര് നിയമത്തെക്കുറിച്ച് സുപ്രീം കോടതിയുടെ ഉത്തരവില് യാതൊന്നും പറഞ്ഞിരുന്നില്ല. അതിനാല് അത് നിലനില്ക്കുന്നതാണെന്നും അജയ് ഭൂഷണ് വ്യക്തമാക്കി.
വ്യക്തികളുടെ അനുവാദമില്ലാതെ വിവരങ്ങള് കൈമാറാന് ആധാര് നിയമത്തില് വ്യവസ്ഥയില്ല. സുപ്രീം കോടതിയുടെ പുതിയ വിധിയില് ആധാര് നിയമത്തെ പറ്റി പറയുന്നില്ലെന്നും പാര്ലമെന്റ് പാസാക്കിയ ആധാര് നിയമം നിലനില്ക്കുമെന്നും അദ്ദേഹം ചൂണ്ടികാട്ടി. സര്ക്കാര് സബസിഡികള് ലഭിക്കുന്നതിന് ആധാര് നമ്പര് ആവശ്യമാണെന്ന് ആധാര് നിയമത്തിന്റെ ഏഴാം വകുപ്പില് പറയുന്നുണ്ട്. ഇക്കാര്യം പുതിയ വിധിയുടെ പശ്ചാത്തലത്തിലും നിലനില്ക്കുമെന്നതാണെന്നും അദ്ദേഹം വ്യക്തമാക്കി.
