തിരൂര്: മനുഷ്യ മനസാക്ഷിയെ ഞെട്ടിക്കുന്ന കൊടുംക്രൂരതയാണ് ഇന്നലെ തിരൂര്-ചമ്രവട്ടം റോഡില് നടന്നത്. പുത്തന് പ്രതീക്ഷകളുമായി വിദ്യാലയത്തിലേക്ക് യാത്രയായ കുരുന്നുകളുടെ മുന്നിലിട്ടാണ് അക്രമിസംഘം തൃപ്രങ്ങോട് മണ്ഡല് ശാരീരിക് ശിക്ഷണ് പ്രമുഖായിരുന്ന കുണ്ടില് ബാബുവിന്റെ മകന് കെ.വിപിനെ വെട്ടിനുറുക്കിയത്. വിദ്യാര്ത്ഥികളും ബസ് യാത്രക്കാരായ സ്ത്രീകളും ഭയന്ന് നിലവിളിക്കുമ്പോഴും ക്രൂരതയുടെ പ്രതിരൂപമായ അവര് ആ ഇരുപത്തിമൂന്നുകാരനെ ആഞ്ഞാഞ്ഞു വെട്ടി.
ഇന്നലെ രാവിലെ 7.15 ഓടെയാണ് ബിപി അങ്ങാടിക്ക് സമീപം പുളിഞ്ചോട്ടില് വെച്ചാണ് വിപിന് നേരെ ആക്രമണമുണ്ടായത്. രാവിലെ ജോലിക്ക് പോകുകയായിരുന്ന വിപിനെ രണ്ട് ബൈക്കുകളിലായി പിന്തുടര്ന്നെത്തിയ മൂന്നംഗ സംഘം വെട്ടി പരിക്കേല്പ്പിച്ചു. എന്നാല് വാഹനം നിര്ത്താതെ വിപിന് വേഗത്തില് മുന്നോട്ട് നീങ്ങി. പക്ഷേ പുളിഞ്ചോട് വെച്ച് അക്രമി സംഘം വിപിനെ ഇടിച്ചുവീഴ്ത്തി. പ്രാണരക്ഷാര്ത്ഥം റോഡിലൂടെ ഓടിയ വിപിനെ 50 മീറ്ററോളം പിന്തുടര്ന്ന് വെട്ടി കൊലപ്പെടുത്തുകയായിരുന്നു. സ്ഥലത്ത് ഭീകരാന്തരീക്ഷം സൃഷ്ടിച്ച ശേഷം പ്രതികള് ബൈക്കില് രക്ഷപ്പെട്ടു. സംഭവ സ്ഥലത്ത് തന്നെ വിപിന് മരിച്ചിരുന്നു. ശരീരമാസകലം അന്പതിലേറെ മുറിവുകളുണ്ടായിരുന്നു. തിരൂര് ജില്ലാ ആശുപത്രിയിലെത്തിച്ച് നടപടിക്രമങ്ങള് പൂര്ത്തിയാക്കിയ ശേഷം മൃതദ്ദേഹം കോഴിക്കോട് മെഡിക്കല് കോളേജില് പോസ്റ്റുമോര്ട്ടം നടത്തി.
കൊലപാതകത്തില് പ്രതിഷേധിച്ച് ബിജെപി-ആര്എസ്എസ് പ്രവര്ത്തകര് തിരൂര് ടൗണില് പ്രതിഷേധ പ്രകടനം നടത്തി. നൂറുകണക്കിന് പ്രവര്ത്തകരാണ് പ്രകടനത്തില് അണിനിരന്നത്.
വൈകിട്ട് അഞ്ചുമണിയോടെ പരപ്പനങ്ങാടി പൂരപ്പുഴയിലെത്തിച്ച മൃതദ്ദേഹം, വിലാപയാത്രയായി ആലത്തിയൂര് മലബാര് വാള്ഡോഫ് സ്കൂളില് പൊതുദര്ശനത്തിനെത്തിച്ചു. ആയിരക്കണക്കിന് ആളുകള് അന്ത്യാഞ്ജലി അര്പ്പിച്ചു.
