തൃപ്പൂണിത്തുറ: അത്തം ഘോഷയാത്രയ്ക്ക് നഗരം അണിഞ്ഞൊരുങ്ങി. ചരിത്ര പ്രസിദ്ധമായ അത്തം ഘോഷയാത്ര നാളെ നടക്കും. രാവിലെ അഞ്ചിന് അത്തം ഉണര്ത്തലോടെ ആഘോഷങ്ങള്ക്ക് തുടക്കമാകും.
രാവിലെ ഒന്പതിന് അത്തം നഗറായ തൃപ്പൂണിത്തുറ ബോയ്സ് ഹൈസ്കൂള് ഗ്രൗണ്ടില് മന്ത്രി കടകംപിള്ളി സുരേന്ദ്രന് അത്തച്ചമയാഘോഷത്തിന് തിരി തെളിക്കും. തുടര്ന്ന് നടക്കുന്ന സാംസ്കാരിക സമ്മേളനത്തില് എം. സ്വരാജ് എംഎല്എ അദ്ധ്യക്ഷനാകും. നഗരസഭ ചെയര്പേഴ്സണ് ചന്ദ്രികാ ദേവി സ്വാഗതം പറയും.
രാവിലെ 10ന് അത്തം ഘോഷയാത്ര നടക്കും. ഘോഷയാത്ര ബോയ്സ് ഹൈസ്കൂളിന്റെ പടിഞ്ഞാറെ കവാടത്തിലൂടെ ബസ്സ് സ്റ്റാന്ഡ് വഴി സ്റ്റാച്യു ജംഗ്ഷനില് എത്തിയശേഷം വടക്കേകോട്ട വഴി പൂര്ണ്ണത്രയീശ ക്ഷേത്രത്തിന്റെ മുന്നിലൂടെ തിരിച്ച് ഹൈസ്കൂള് ഗ്രൗണ്ടിലെത്തി സമാപിക്കും. രാവിലെ 10 മണി മുതല് അത്തപ്പൂക്കള മത്സരം, വൈകിട്ട് മൂന്ന് മുതല് പൂക്കള പ്രദര്ശനം, വൈകിട്ട് ആറിന് ഇന്ദിരാ പ്രിയദര്ശിനി ലായം കൂത്തമ്പലത്തില് നടക്കുന്ന കലാസന്ധ്യ, വൈകിട്ട് ഏഴിന് തബല ഫ്യൂഷന്.
