മുഹമ്മ: കക്കാ വ്യവസായ മേഖലയില് ആധുനിക വല്ക്കരണവും പുത്തന് വിപണന രീതികളും വേണമെന്ന് മന്ത്രി ടി.എം തോമസ് ഐസക് പറഞ്ഞു. സര്ക്കാര് ആലപ്പുഴ-കോട്ടയം ജില്ലകളിലെ കക്കാവ്യവസായ സഹ.സംഘങ്ങള്ക്ക് അനുവദിച്ച മൂന്നുകോടി രൂപ പ്രവര്ത്തന ഗ്രാന്റ് വിതരണം ചെയ്യുകയായിരുന്നു അദ്ദേഹം.
ഓരോ വര്ഷം കഴിയുംതോറും കക്കയുടെയും മത്സ്യത്തിന്റെയും പ്രജനനം ശുഷ്ക്കിക്കുകയാണ്. മലിനീകരണമാണ് പ്രധാന കാരണം. വേമ്പനാടുകായലിന്റെ അടിത്തട്ടില് അടിഞ്ഞുകൂടിയിട്ടുള്ള പ്ലാസ്റ്റിക് അടക്കമുള്ള മാലിന്യങ്ങള് ഇനിയും നീക്കം ചെയ്തില്ലെങ്കില് കക്കയുടെയും മത്സ്യത്തിന്റെയും നിലനില്പ്പ് അസാദ്ധ്യമാണ്. കക്കാവ്യവസായ സംഘങ്ങള് മുന്നോട്ടുവന്ന് ഈ മാലിന്യങ്ങള് നീക്കം ചെയ്ത് സര്ക്കാരിന് മാതൃകകാട്ടണം. ശേഷിക്കുന്നവ സര്ക്കാരും മാറ്റും.
കക്കയുടെ വിഭവ ശോഷണത്തെ തടയുന്നതിന് കര്മ്മപരിപാടി വേണം. കക്കാ ലഭ്യതയില്ലാത്ത പ്രദേശങ്ങള് തെരഞ്ഞെടുത്ത് ഇവയുടെ പ്രജനന കേന്ദ്രമാക്കണം. കൂടാതെ പരിമിതമായെങ്കിലും ലഭിക്കുന്ന കക്കാ ശാസ്ത്രീയമായി സംസ്ക്കരിച്ച് ഉയര്ന്ന വിലയ്ക്ക് ബ്രാന്റഡ് ഉല്പ്പന്നമായി വില്ക്കണം. കക്കായിറച്ചി ഉപയോഗിച്ച് മരുന്ന് നിര്മ്മിക്കാമെന്ന് ഓസ്ട്രേലിയയിലെ വിദഗ്ദ്ധര് കണ്ടുപിടിച്ചിട്ടുണ്ടെന്നും മന്ത്രി പറഞ്ഞു. ജില്ലാപഞ്ചായത്ത് പ്രസിഡന്റ് ജി വേണുഗോപാല് അധ്യക്ഷനായി.
