കൊച്ചി: കൊച്ചി ശാസ്ത്ര സാങ്കേതിക സര്വ്വകലാശാലയും കപ്പല് നിര്മ്മാണ സുരക്ഷാ രംഗത്തെ ലോക പ്രശസ്ത ജപ്പാന് ഏജന്സി നിപ്പോണും തമ്മില് സര്വ്വകലാശാലയിലെ ഷിപ്പ് ടെക്നോളജി വകുപ്പില് അക്കാദമിക് മികവ് പുലര്ത്തുന്ന വിദ്യാര്ത്ഥികള്ക്ക് നല്കി വരുന്ന ‘ക്ലാസ്സ്എന്കെ’ അവാര്ഡ് സംബന്ധിച്ച് ധാരണയായി.
വൈസ് ചാന്സലര് ഡോ. ജെ. ലതയുടെ സാന്നിധ്യത്തില് ‘ക്ലാസ്സ്എന്കെ’ യുടെ ദക്ഷിണേഷ്യന് റീജിയണല് മാനേജര് ഡോ. അബ്ദുള് റഹീമും പരീക്ഷാ കണ്ട്രോളര് സുനില് കെ നാരായണന്കുട്ടിയും ധാരണാപത്രം ഒപ്പുവച്ചു. ഷിപ്പ് ടെക്നോളജി വകുപ്പിന്റെ ബി.ടെക് നേവല് ആര്ക്കിടെക്ച്ചര് ആന്റ് ഷിപ്പ് ബില്ഡിംഗ് കോഴ്സിലെ അവസാന വര്ഷത്തെ മികച്ച മൂന്ന് പ്രൊജക്ടുകള്ക്കാണ് എല്ലാ വര്ഷവും അവാര്ഡ് നല്കുന്നത്. 60,000 രൂപയും സാക്ഷ്യപത്രവും അടങ്ങുന്നതാണ് അവാര്ഡ്.
2015 ലെ ജേതാക്കള് ഗൗതം കൃഷ്ണന് സി.ജി. കിരണ് രമേഷ,് സംഗീത് റോഷന് എന്നിവര്ക്കും 2016 ലെ അവാര്ഡ് ആര്.ആര്. വിഷ്ണു, ശ്രീനാഥ് സുബ്രഹ്മണ്യന്, രോഹിത് എസ് നായര് എന്നിവര്ക്കും സമ്മാനിച്ചു. ഷിപ്പ് ടെക്നോളജി വകുപ്പ് മേധാവി ഡോ. മറിയാമ്മ ചാക്കോ, ഡോ. സി.ബി. സുധീര്, ഡോ. മനോജ് ടി ഐസക്ക്, എസ്.ജി. രാഹുല് എന്നിവര് സംസാരിച്ചു.
