അടിമാലി : കൊച്ചി-ധനുഷ്‌ക്കോടി ദേശീയപാതയില്‍ നിരീക്ഷണ കാമറകള്‍ സ്ഥാപിക്കാനുള്ള നീക്കം നിലച്ചു. ഒരു വര്‍ഷം മുമ്പായിരുന്നു ദേശീയപാത 49ല്‍ നേര്യമംഗലം മുതല്‍ മൂന്നാര്‍ വരെ നിരീക്ഷണ കാമറകള്‍ സ്ഥാപിക്കാനുള്ള പദ്ധതിക്ക് പോലീസ് തുടക്കമിട്ടത്.
നൂറോളം നിരീക്ഷണ കാമറകള്‍ സ്ഥാപിച്ച് മേഖലയെ പോലീസ് നിരീക്ഷണത്തില്‍ കൊണ്ടുവരികയായിരുന്നു പദ്ധതിയുടെ ലക്ഷ്യം. ജനവാസമില്ലാത്ത നേര്യമംഗലം വനമേഖലയില്‍ ഉണ്ടാകുന്ന അപകടങ്ങള്‍ പുറത്തറിയാന്‍ വൈകുന്നതും വനമേഖല കേന്ദ്രീകരിച്ച് കുറ്റകൃത്യങ്ങള്‍ വര്‍ദ്ധിച്ചതും ആയിരുന്നു കാമറകള്‍ സ്ഥാപിക്കാന്‍ പോലീസിനെ പ്രേരിപ്പിച്ചത്. പദ്ധതിക്കായുള്ള പ്രാഥമിക ജോലികള്‍ നടന്നതൊഴിച്ചാല്‍ പദ്ധതി പാടെ നിലച്ച മട്ടാണ്.
സ്വകാര്യ കമ്പനികളുമായി സഹകരിച്ച് പദ്ധതി നടപ്പാക്കാന്‍ ഉദ്ദേശിച്ചായിരുന്നു ആദ്യ വട്ട ചര്‍ച്ചകള്‍ പൂര്‍ത്തീകരിച്ചത്. ഇതിന്റെ ഭാഗമായി കെല്‍ട്രോണിന്റെ സഹകരണത്തോടെ മൂന്നാര്‍ ടൗണിന്റെ വിവിധ മേഖലകളില്‍ നിരീക്ഷണ കാമറകള്‍ സ്ഥാപിക്കുകയും ചെയ്തു. എന്നാല്‍ തുടര്‍ നടപടികള്‍ ഉണ്ടാകാത്തതാണ് പദ്ധതി നിലക്കാന്‍ ഇടയാക്കിയത്. മൂന്നാര്‍ ഡിവൈഎസ്പിയുടെയും അടിമാലി സിഐയുടെയും നേതൃത്വത്തിലുള്ള സംഘമാണ് പരിശോധന പൂര്‍ത്തിയാക്കി ഉന്നത ഉദ്യോഗസ്ഥര്‍ക്ക് റിപ്പോര്‍ട്ട് സമര്‍പ്പിച്ചിരിക്കുന്നത്.
ദേശീയപാതയിലെ പ്രധാന ടൗണുകള്‍, വന മേഖല, കൊടും വളവുകള്‍ എന്നിവിടങ്ങളില്‍ കാമറകള്‍ സ്ഥാപിക്കണമെന്നായിരുന്നു റിപ്പോര്‍ട്ടില്‍ ശുപാര്‍ശ ചെയ്തിരുന്നത്.
പക്ഷെ റിപ്പോര്‍ട്ട് സമര്‍പ്പിച്ച ശേഷം പദ്ധതി പൂര്‍ത്തീകരണത്തിനുള്ള നീക്കങ്ങളൊന്നും ഉണ്ടാകാതെ പോയതാണ് പദ്ധതി ഫയലില്‍ ഉറങ്ങാനുള്ള പ്രധാന കാരണം.
