കറുകച്ചാല്: കേരളത്തിലെ പാരിസ്ഥിതിക പ്രവര്ത്തനങ്ങള്ക്ക് ജനങ്ങള്തന്നെ മുന്നിട്ടിറങ്ങേണ്ട കാലം സംജാതമായെന്ന് തപസ്യകലാ സാഹിത്യവേദി സംസ്ഥാന ജനറല് സെക്രട്ടറി സി. രജിത്കുമാര്. തപസ്യ കറുകച്ചാല് യൂണിറ്റ് ഉദ്ഘാടനം ചെയ്യുകയായിരുന്നു അദ്ദേഹം.
കലാ സാംസ്കാരിക പ്രവര്ത്തനങ്ങള്ക്കൊപ്പം പ്രകൃതിസംരക്ഷണത്തിനും തപസ്യ മുന്പന്തിയില് നില്ക്കണം. വളരുന്ന തലമുറയ്ക്ക് കലയും സാഹിത്യവും അത്യന്താപേക്ഷിതമാണ്. കുട്ടികള്ക്കുള്ള പരിപാടികള്ക്ക് മുന്തൂക്കം നല്കണമെന്നും അദ്ദേഹം പറഞ്ഞു.
യൂണിറ്റ് പ്രസിഡന്റ് രാധാകൃഷ്ണന് ചമ്പക്കര അദ്ധ്യക്ഷനായി. കേന്ദ്രസാഹിത്യ അക്കാദമി അവാര്ഡ് ജേതാവ് പ്രൊഫ. വി.കെ. ഹരിഹരനുണ്ണിത്താന്, ഭാരതീയ വിചാരകേന്ദ്രം സംസ്ഥാന വൈസ് പ്രസിഡന്റ് പ്രൊഫ. സി.കെ. ഐസക്ക്, തപസ്യ സംസ്ഥാന സെക്രട്ടറി പി.ജി. ഗോപാലകൃഷ്ണന്, ജില്ലാ ജനറല് സെക്രട്ടറി ജയദേവ്. വി.ജി, എന്.വി. വേണുഗോപാലക്കുറുപ്പ്, സജീവന് ചമ്പക്കര, ആര്. ശ്രീകുമാര്, വിദ്യാശങ്കര് എന്നിവര് സംസാരിച്ചു.
