കോഴിക്കോട്: സമഗ്ര ശുചിത്വ മാലിന്യ സംസ്കരണ പരിപാടികളുടെ ഭാഗമായി സംസ്ഥാന ഹരിതകേരളം മിഷന്റെ ആഭിമുഖ്യത്തില് നടപ്പാക്കുന്ന ‘മാലിന്യത്തില് നിന്ന് സ്വാതന്ത്ര്യം’ പരിപാടിയോടനുബന്ധിച്ച് സന്നദ്ധ പ്രവര്ത്തകര് നടത്തുന്ന ഗൃഹസന്ദര്ശനം ഇന്ന് ആരംഭിക്കും. കുടുംബശ്രീ പ്രവര്ത്തകര്, അങ്കണവാടി ടീച്ചര്മാര്, ആശാ വര്ക്കര്മാര്, സന്നദ്ധ പ്രവര്ത്തകര്, രാഷ്ട്രീയ സാമൂഹ്യ പ്രവര്ത്തകര്, വിരമിച്ച ജീവനക്കാര് തുടങ്ങിയവരാണ് വീടുകള് സന്ദര്ശിക്കുന്നത്. മാലിന്യ സംസ്കരണം സംബന്ധിച്ച വിവര ശേഖരണവും ബോധവത്ക്കരണവുമാണ് ഗൃഹ സന്ദര്ശനത്തിന്റെ മുഖ്യ ലക്ഷ്യം.
ഗൃഹസന്ദര്ശന പരിപാടി 13 വരെ നീണ്ടു നില്ക്കും. 50 വീടുകള്ക്ക് രണ്ട് വളന്റിയര്മാരെ വീതമാണ് നിയോഗിച്ചിട്ടുള്ളത്. സ്വാതന്ത്ര്യ ദിനാഘോഷ ചടങ്ങില് മന്ത്രിമാര് ദേശീയ പതാക ഉയര്ത്തുന്ന ചടങ്ങിന് ശേഷം ‘മാലിന്യത്തില് നിന്ന് സ്വാതന്ത്ര്യം’ എന്ന പ്രഖ്യാപനം നടത്തും. ഇതോടെ കേരളത്തെ സമ്പൂര്ണ്ണ മാലിന്യമുക്ത സംസ്ഥാനമാക്കുകയെന്ന മഹായജ്ഞത്തിന് തുടക്കമാകും.
സന്നദ്ധ പ്രവര്ത്തകര് ശേഖരിക്കുന്ന വിവരങ്ങളുടെയും അവസ്ഥാ നിര്ണ്ണയ പഠനത്തിന്റെ ക്രോഡീകരണവും വിശകലനവും അടിസ്ഥാനമാക്കിയാണ് സമഗ്ര ശുചിത്വമാലിന്യ സംസ്കരണ പരിപാടിയുടെ തുടര് ക്രിയാത്മക പരിപാടികള്ക്ക് നേതൃത്വം നല്കുന്നത്.
