ആലപ്പുഴ: നെഹ്റു ട്രോഫി വള്ളംകളി പവിലിയനുകളുടെ നിര്മാണം അവസാനഘട്ടത്തില്. നെഹ്റു പവിലിയനിലെ അറ്റകുറ്റപ്പണികള് പൂര്ത്തീകരിച്ചു. ട്രാക്കുകളുടെ ആഴംകൂട്ടല് ദ്രുതഗതിയില് പുരോഗമിക്കുകയാണെന്ന് ഇറിഗേഷന് എക്സി. എന്ജിനീയര് ആര്. രേഖ പറഞ്ഞു. വിവിഐപികള് എത്തുന്ന നെഹ്റു പവിലിയനിലേക്കുള്ള പ്രവേശനം നിയന്ത്രിക്കും. നെഹ്റു പവിലിയനില് കൂടുതല് പോലീസുകാരെ നിയോഗിക്കുമെന്ന് ഡിവൈഎസ്പി എം.ഇ. ഷാജഹാന് പറഞ്ഞു.
പുന്നമടയിലേക്കുള്ള റോഡുകളുടെ അറ്റകുറ്റപ്പണി ആരംഭിച്ചതായും ടാറിങ് ഉടന് ആരംഭിക്കുമെന്നും പൊതുമരാമത്ത് നിരത്തുവിഭാഗം ഡെപ്യൂട്ടി എക്സിക്യൂട്ടീവ് എന്ജിനീയര് എസ്. ഉഷാകുമാരി അറിയിച്ചു. മുങ്ങല്വിദഗ്ധരുടെയടക്കം നാലു ജില്ലകളിലെ ഫയര്- റെസ്ക്യൂ ജീവനക്കാരുടെ സേവനം ലഭ്യമാക്കുമെന്ന് അസിസ്റ്റന്റ് ഡിവിഷണല് ഓഫീസര് എം.എസ്. സുവി പറഞ്ഞു.
വള്ളംകളിയുടെ ആവശ്യത്തിനായി വാടകയ്ക്ക് എടുക്കുന്ന ബോട്ടുകളില് ജിപിഎസ് സംവിധാനം സ്ഥാപിക്കുന്നതിന്റെ സാധ്യത പരിശോധിക്കാന് കളക്ടര് നിര്ദേശം നല്കി. മെഡിക്കല് സംഘത്തിന്റെ സേവനം ഉറപ്പാക്കാന് ഡിഎംഒയ്ക്ക് നിര്ദേശം നല്കി.
