ചേര്ത്തല: വസ്തുവാങ്ങല് ഇടപാടില് സഹകരണ ബാങ്ക് അഴിമതി നടത്തിയെന്ന് പരാതി. കോണ്ഗ്രസ് ഭരിക്കുന്ന പള്ളിപ്പുറം സഹകരണ ബാങ്കിനെതിരെയാണ് അംഗം പരാതി നല്കിയത്.
ഇതിനെ തുടര്ന്ന് കേസ് രജിസ്റ്റര്ചെയ്ത് അന്വേഷിക്കാന് വിജിലന്സ് ആന്ഡ് ആന്റികറപ്ഷന് ബ്യൂറോയ്ക്ക് സഹകരണ വിജിലന്സ് ശുപാര്ശ നല്കി.
വിജിലന്സ് ആന്ഡ് ആന്റികറപ്ഷന് ബ്യൂറോയ്ക്ക് 2015 നവംബറില് സമര്പ്പിച്ച പരാതി സഹകരണ വിജിലന്സാണ് പരിശോധിച്ചത്. അവര് അന്വേഷണ റിപ്പോര്ട്ട് വിജിലന്സ് ആന്ഡ് ആന്റികറപ്ഷന് ബ്യൂറോയ് കൈമാറുകയും ക്രിമിനല് ഗൂഢാലോചന ഉള്പ്പെടെയുള്ള വകുപ്പുകള് പ്രകാരം കേസെടുത്ത് അന്വേഷിക്കാന് ശുപാര്ശ നല്കുകയും ചെയ്തു.
ദക്ഷിണമേഖല സഹകരണ വിജിലന്സ് നല്കിയ വിവരാവകാശ രേഖയിലാണ് ഇക്കാര്യം വ്യക്തമാക്കുന്നത്. അന്വേഷണ റിപ്പോര്ട്ടിന്റെ പകര്പ്പ് ആവശ്യപ്പെട്ടുള്ള അപേക്ഷയ്ക്കുള്ള മറുപടിയിലാണ് ശുപാര്ശയുടെ വിവരം ഉള്ളത്.
ഈ സാഹചര്യത്തില് റിപ്പോര്ട്ടിന്റെ പകര്പ്പ് നല്കുന്നത് വിജിലന്സ് അന്വേഷണത്തെയും തെളിവുകളെയും ബാധിക്കുമെന്ന് മറുപടിയില് പറയുന്നു. സെന്റിന് 91,250 രൂപ മാത്രം വിലയുള്ള വസ്തു 4,33,333 രൂപ പ്രകാരം 2015 സപ്തംബര് 17ന് വാങ്ങിയെന്നാണ് പരാതി.
മൂന്ന് സെന്റ് ഭൂമിയാണ് ബാങ്ക് വാങ്ങിയത്. ഇതേ വസ്തുവിന്റെ ഭാഗമായ രണ്ട് ഭൂമി സ്വകാര്യവ്യക്തി 2015 മെയ് 20ന് വാങ്ങിയത് സെന്റിന് 91,250 രൂപ പ്രകാരമാണ്. നാല് മാസത്തെ വ്യത്യാസത്തില് നടന്ന ഇടപാടിലാണ് വിലയില് ലക്ഷങ്ങളുടെ അന്തരമുള്ളത്.
മാത്രമല്ല, പ്രസ്തുത വസ്തുവിന്റെ ക്രയവിക്രയം തടഞ്ഞ് ചേര്ത്തല പ്രിന്സിപ്പല് മുനിസിഫ് കോടതിയുടെ ഉത്തരവ് നിലനില്ക്കെയാണ് ഇടപാട് നടത്തിയതെന്നും പരാതിയില് പറയുന്നു.
