ആലപ്പുഴ: സംസ്ഥാന സര്ക്കാര് നിരോധിച്ച കളനാശിനികളുടെ ഉപയോഗം കുട്ടനാട്ടില് വീണ്ടും വര്ദ്ധിക്കുന്നു. പരിസ്ഥിതിയെ നശിപ്പിക്കുന്നതായി കണ്ടെത്തിയതിനെ തുടര്ന്ന് അഞ്ച് വര്ഷം മുമ്പ് സംസ്ഥാന കൃഷി വകുപ്പ് നിരോധിച്ച പാരക്വോട്ട് ഡൈക്ലോറൈഡ് ഇനത്തില്പ്പെട്ട കളനാശിനിയാണ് അമിത വിലയ്ക്ക് വിറ്റഴിക്കുന്നത്.
ചെടികളിലെ ഹരിതകം ചോര്ത്തി മണിക്കൂറുകള്ക്കകം അവയെ നശിപ്പിക്കുന്ന ഇനത്തില്പെട്ട കളനാശിനിയാണിത്. ബഹുരാഷ്ട്ര കമ്പനികളടക്കം നിരവധി സ്ഥാപനങ്ങള് ഇത്തരം കളനാശിനികള് ഉത്പാദിപ്പിച്ചു വിതരണം നടത്തുന്നുണ്ട്. കൃഷിസാങ്കേതിക ഉദ്യോഗസ്ഥന്റെ കുറിപ്പടിയുടെ അടിസ്ഥാനത്തിലല്ലാതെ കീടനാശിനികള് വിതരണം ചെയ്യുന്നത് കുറ്റകരമാണെന്ന് വ്യവസ്തയുണ്ടെങ്കിലും വില്പ്പനക്കാരും ഇത് പാലിക്കാറില്ല. പെട്ടെന്ന് പ്രയോജനപ്പെടുമെന്ന് പറഞ്ഞ് ഇത്തരം കളനാശിനികള് കൂടുതലായി വില്ക്കുന്നു. വിളവിറക്കിയ കര്ഷകര് അവ സംരക്ഷിക്കാന് കീടനിയന്ത്രണ മാര്ഗ്ഗങ്ങള് തേടിയെത്തുന്നത് കുറിപ്പിടികളില്ലാതെയാണ്.
നിയന്ത്രിത ഉപയോഗത്തിന് മാത്രം അനുമതിയുള്ള കാര്ബോസള്ഫാന്, ക്ലോറിപൈറിഫോസ്, സൈപ്പര്മെത്രിന്, ലാംഡാസൈഹാലോത്രിന്, അസഫേറ്റ്, 2 4ഡി, ഗ്ലൈഫോസേറ്റ് എന്നീ കീടനാശിനികളും യാതൊരു മാനദണ്ഡവും പാലിക്കാതെ ഉപയോഗിക്കുന്നു. മാരക കീടനാശിനികള്ക്കെതിരെ കൃഷിവകുപ്പ് നടത്തുന്ന ബോധവത്കരണ പ്രചരണത്തിന്റെ ഭാഗമായാണ് നിയന്ത്രണങ്ങള് ഏര്പ്പെടുത്തിയത്.
വിതരണക്കാര് മാരകമായ കീടനാശിനികള് കര്ഷകരുടെ കൃഷിയിടങ്ങളില് നേരിട്ട് എത്തിച്ച് കൊടുക്കുന്നതും അനധികൃതമായി എത്തിക്കുന്ന കീടനാശിനികള് ഉപയോഗിക്കുന്നതും ശ്രദ്ധയില്പ്പെട്ടാല് കര്ശന നടപടിയെടുക്കുമെന്ന് പ്രഖ്യാപനമല്ലാതെ നടപടി മാത്രം ഉണ്ടാകുന്നില്ല.
ശാസ്ത്രീയകൃഷി രീതികള് അവലംബിച്ചാല് കീടനാശിനി പ്രയോഗം നിയന്ത്രിക്കാമെന്നും കൃഷി വകുപ്പ് വ്യക്തമാക്കുമ്പോഴും കീടരോഗങ്ങള് പടരുന്ന അവസരങ്ങളില് ഉപയോഗിക്കേണ്ട കീടനാശിനികള് സംബന്ധിച്ച് കൃത്യമായ വിവരങ്ങള് നല്കാന് മതിയായ ഉദ്യോഗസ്ഥരില്ലെന്ന് കര്ഷകര് പറയുന്നു. കൃഷി മരുന്നുകള്ക്ക് ആവശ്യാനുസരണം കുറിപ്പടി നല്കാന് കൃഷിഭവനുകളില് സ്പെഷ്യല് ഉദ്യോഗസ്ഥനെ നിയമിച്ചാല് മാത്രമേ ഇത്തരം നിര്ദ്ദേശങ്ങള് പൂര്ണതോതില് നടപ്പാക്കാന് കഴിയൂ.
നിരോധനത്തിനു പിന്നാലെ അയല് സംസ്ഥാനങ്ങളില് നിന്ന് കേരളത്തിലേക്ക് കീടനാശിനി കടത്തും വര്ദ്ധിച്ചു. തമിഴ്നാട്ടില് 260 രൂപയ്ക്ക് ലഭിക്കുന്ന ഒരു ലിറ്റര് പാരക്വോട്ട് ഡൈക്ലോറെഡ് കേരളത്തിലെത്തിച്ച് നല്കിയാല് 600 വരെ രൂപ ലഭിക്കും. ഇത്തരം കളനാശിനികള് തോട്ടംമേഖലയിലും നെല്ക്കൃഷി മേഖലയിലും വ്യാപകമായി ഇപ്പോഴും ഉപയോഗിക്കുന്നു. തമിഴ്നാട്ടില് നിന്നു ഇടുക്കി വഴിയും വാളയാര് വഴിയുമാണ് കളനാശിനി കേരളത്തിലേയ്ക്ക് ഒഴുകുന്നത്.
നിരോധിക്കപ്പെട്ടവ കണ്ടെത്തി നടപടി സ്വീകരിക്കാന് അതിര്ത്തി ചെക്പോസ്റ്റുകളില് മതിയായ സംവിധാനങ്ങള് ഒരുക്കാതെയാണ് കളനാശിനി നിരോധിച്ചത്. ഇതരസംസ്ഥാനങ്ങളില് സുലഭമായി ലഭിക്കുന്ന കളനാശിനി കേരളത്തില് മാത്രം നിരോധിച്ചത് വിപരീതഫലമുണ്ടാക്കിയെന്ന് കൃഷി വകുപ്പ് ഉദ്യോഗസ്ഥരും ചൂണ്ടിക്കാട്ടുന്നു.
