കൊല്ലം: അഷ്ടമുടി ശ്രീവീരഭദ്രസ്വാമി ക്ഷേത്രത്തില് കര്ക്കടക വാവുബലി 23ന് വെളുപ്പിന് നാലിന് ആരംഭിച്ച് വൈകിട്ട് 3.30ന് സമാപിക്കുമെന്ന് തൃക്കരുവ കുറ്റിയഴികം ദേവസ്വം ഭാരവാഹികള് പത്രസമ്മേളനത്തില് പറഞ്ഞു. ജ്യോതിഷ പണ്ഡിതനും താന്ത്രികനുമായ വന്മള പി.വി.വിശ്വനാഥന് ശാന്തിയുടെ മുഖ്യകാര്മികത്വത്തിലാണ് ബലിതര്പ്പണം നടക്കുക.
ബലിയിടാന് എത്തുന്ന ഭക്തര്ക്ക് തിലഹോമം ഉള്പ്പടെയുള്ള പൂജകള് വീരഭദ്രസ്വാമി ക്ഷേത്രത്തില് ക്ഷേത്രംമേല്ശാന്തി എന്.സുകുമാരന്റെയും നിത്യശാന്തി രാംകുമാറിന്റെയും മുഖ്യകാര്മ്മികത്വത്തില് നടക്കും. അഷ്ടമുടി ക്ഷേത്രത്തില് ബലിയിടാന് എത്തുന്ന സ്ത്രീകള്ക്ക് പ്രത്യേകസൗകര്യം ഇവിടെ സജ്ജീകരിച്ചിട്ടുണ്ട്. വീരഭദ്രസ്വാമി ക്ഷേത്രത്തിന് പടിഞ്ഞാറ് അഷ്ടമുടിക്കായലും കല്ലടയാറും അറബിക്കടലും സംഗമിക്കുന്ന ത്രിവേണിസംഗമത്തിലാണ് ബലിതര്പ്പണ ചടങ്ങുകള് നടക്കുന്നത്. അഷ്ടമുടിയില് ലൈഫ്ഗാര്ഡിന്റെ സേവനവും വാവുബലി ദിവസമുണ്ടാകും.
ബലിതര്പ്പണം നടത്താന് എത്തുന്ന ഭക്തരുടെ സൗകര്യാര്ത്ഥം കൊല്ലം-കുണ്ടറ-അഞ്ചാലുംമൂട് എന്നിവിടങ്ങളില് നിന്നും 23ന് രാവിലെ അഞ്ചുമുതല് അഷ്ടമുടി വീരഭദ്രസ്വാമി ക്ഷേത്രത്തിലേക്ക് കെഎസ്ആര്ടിസി സ്പെഷ്യല് സര്വീസുകള് ഏര്പ്പെടുത്തിയിട്ടുണ്ടെന്നും ദേവസ്വം ഭാരവാഹികള് വ്യക്തമാക്കി.
