കണ്ണൂര്: ജില്ലാ ടൂറിസം പ്രൊമോഷന് കൗണ്സില് സംഘടിപ്പിക്കുന്ന വെര്ട്ടിക്കല് മാരത്തണ് 30 ന് പൈതല് മലയില് നടക്കും. രാവിലെ 11.30ന് പൈതല്മലയിലെ പൊട്ടന്പ്ലാവ് ചര്ച്ച് പരിസരത്ത് നിന്നാരംഭിച്ച് ഡിടിപിസിയുടെ ടൂറിസ്റ്റ് റിസോര്ട്ടില് അവസാനിക്കുന്ന രീതിയിലാണ് മാരത്തണ് ആസൂത്രണം ചെയ്തിരിക്കുന്നതെന്ന് ഡിടിപിസി ചെയര്മാന്കൂടിയായ ജില്ലാ കലക്ടര് മീര് മുഹമ്മദലി പറഞ്ഞു. ജില്ലയില് ഇത്തരമൊരു ടൂറിസം പ്രൊമോഷന് പരിപാടി നടക്കുന്നത് ആദ്യമായാണെന്ന് അദ്ദേഹം പറഞ്ഞു. ജില്ലയിലെ വിനോദസഞ്ചാര സാധ്യതകളുള്ള പ്രധാന കേന്ദ്രങ്ങളിലൊന്നാണ് പൈതല്മല. ഇവിടേക്ക് കൂടുതല് വിനോദസഞ്ചാരികളെ എത്തിക്കുകയാണ് പരിപാടിയിലൂടെ ലക്ഷ്യമിടുന്നത്. മാരത്തണില് പങ്കെടുക്കാനെത്തുന്നവര്ക്ക് ആരോഗ്യ-സുരക്ഷാ സഹായങ്ങള് നല്കുന്നതിന് സംവിധാനമൊരുക്കും.
ജില്ലയിലെ മറ്റ് വിനോദ സഞ്ചാര കേന്ദ്രങ്ങളിലും ഇത്തരം പരിപാടികള് സംഘടിപ്പിക്കും. ആഗസ്ത് അവസാനത്തോടെ മുഴപ്പിലങ്ങാട് ബീച്ചില് 9 കിലോമീറ്റര് ദൂരത്തില് മാരത്തണ് സംഘടിപ്പിക്കുന്നതിനുള്ള ഒരുക്കങ്ങള് ആരംഭിച്ചതായും ജില്ലാ കലക്ടര് പറഞ്ഞു.
10,000 രൂപയാണ് ഒന്നാം സമ്മാനം. 8000, 6000 രൂപയാണ് രണ്ടും മൂന്നും സമ്മാനങ്ങള്. 18നും 50നുമിടയില് പ്രായമുള്ള കായികക്ഷമതയുളളവര്ക്ക് പങ്കെടുക്കാം. താല്പര്യമുള്ളവര് 28നു മുമ്പ് പേര് രജിസ്റ്റര് ചെയ്യണം. 50 രൂപയാണ് രജിസ്ട്രേഷന് ഫീസ്. ആദ്യം രജിസ്റ്റര് ചെയ്യുന്ന 100 പേര്ക്കായിരിക്കും അവസരം. ഫോണ്- 0497 2706336, 9645454500.
പിആര് ചേമ്പറില് നടന്ന വാര്ത്താസമ്മേളനത്തില് ടൂറിസം ഡെപ്യൂട്ടി ഡയറക്ടര് ഡി.ഗിരീഷ് കുമാര്, സെക്രട്ടറി ജിതീഷ് ജോസ് എന്നിവരും പങ്കെടുത്തു.
