അമ്മമാരുടെ പ്രായം, കുഞ്ഞുങ്ങളുടെ എണ്ണം

കേരളത്തിലെ ജനസംഖ്യ കണക്കെടുപ്പില്‍ 1991-ല്‍ കണ്ട പ്രത്യേകത ഹിന്ദുക്കളുടെ എണ്ണം 0.8 ശതമാനം കുറഞ്ഞ് 57.28 ശതമാനം ആയതും ക്രിസ്ത്യന്‍ ജനസംഖ്യ 1.25 ശതമാനം കുറഞ്ഞ് 19.31 ശതമാനം ആയതുമാണ്.

പത്തുവര്‍ഷം കഴിഞ്ഞ് 2001 ലെ കാനേഷുമാരിയില്‍ ആകെ ജനസംഖ്യ 3,18,41,374 ആയിരുന്നു: ഹിന്ദുക്കള്‍ 1,78,83,449, മുസ്ലിങ്ങള്‍ 78,63,842, ക്രിസ്ത്യന്‍ വിഭാഗക്കാര്‍ 60,57,427 എന്നിങ്ങനെ. അതായത് ഹിന്ദുക്കള്‍ 56.16 ശതമാനവും മുസ്ലിങ്ങള്‍ 24.69 ശതമാനവും ക്രിസ്ത്യന്‍ വിഭാഗങ്ങള്‍ 19.02 ശതമാനവും ആയി. 1961 ല്‍ നിന്ന് 2001 എത്തുമ്പോള്‍ ഹിന്ദുക്കള്‍ 4.67 ശതമാനം കുറയുകയും ക്രിസ്ത്യന്‍ വിഭാഗങ്ങള്‍ 2.2 ശതമാനം കുറയുകയും ചെയ്തു, മുസ്ലിം ജനസംഖ്യ 6.78 ശതമാനം വര്‍ദ്ധിച്ചു.

2011ല്‍ പ്രസിദ്ധീകരിച്ച ജനസംഖ്യാ കണക്കുകള്‍ പ്രകാരം കേരളത്തിലെ ആകെ ജനസംഖ്യ 3,34,06,061 ആണ്. ഹിന്ദുക്കള്‍ 1,82,82,492, മുസ്ലിം 88,73,472, ക്രിസ്ത്യാനികള്‍ 61,41,269. ആകെ ജനസംഖ്യയുടെ 54.9 ശതമാനം ഹിന്ദുക്കള്‍, 26.6 ശതമാനം മുസ്ലിങ്ങള്‍, 18.4 ശതമാനം ക്രിസ്ത്യാനികള്‍.

ഒരു അമ്മയ്‌ക്ക് പിറന്ന കുട്ടികളുടെ എണ്ണം അനുസരിച്ചുള്ള കണക്കുകളും ലഭ്യമാണ്. ഹിന്ദു വിഭാഗത്തില്‍ പെട്ട അമ്മമാരാണ് ഒന്നും രണ്ടും കുട്ടികളുള്ളവരില്‍ മുന്നില്‍. മുസ്ലിം വിഭാഗത്തില്‍ പെട്ട അമ്മമാരാണ് രണ്ടില്‍ കൂടുതല്‍ കുട്ടികളുള്ളവരുടെ വിഭാഗത്തില്‍ മുന്നില്‍, തൊട്ട് പിന്നില്‍ ക്രിസ്ത്യന്‍ മതവിഭാഗത്തില്‍ പെട്ട അമ്മമാരും.

അമ്മമാരുടെ പ്രായം അനുസരിച്ചുള്ള കണക്കു നോക്കിയാല്‍ മുസ്ലിം സമൂഹത്തില്‍നിന്നാണ് 20 വയസ്സിന് താഴെയുള്ള അമ്മമാര്‍ ഏറ്റവും കൂടുതല്‍. ഹിന്ദുക്കളില്‍ 13.88 ശതമാനം അമ്മമാര്‍ 20-25 വയസിനിടയിലുള്ളവരാണ്. മുസ്ലിം സമൂഹത്തില്‍ ഈ തോത് 18.40, ക്രിസ്ത്യാനികളില്‍ 3.14 ശതമാനം എന്നിങ്ങനെയാണ്. ഹിന്ദുക്കളില്‍ 17.89 ശതമാനം അമ്മമാര്‍ക്കും പ്രായം 25-നും 29 നും ഇടയിലാണ്. ഈ പ്രായ വിഭാഗത്തില്‍ മുസ്ലിം സമൂഹത്തില്‍നിന്നുള്ളത് 13.73 ശതമാനം അമ്മമാരും ക്രിസ്ത്യന്‍ വിഭാഗത്തില്‍നിന്ന് 8.98 ശതമാനവുമാണ്. 2005 ലെ കണക്കാണിത്. (പട്ടിക- 2 കാണുക)

ജനസംഖ്യാ കണക്കുകള്‍ കാണിക്കുന്നത് വാസ്തവത്തില്‍ ജനപ്പെരുപ്പവും മതാടിസ്ഥാനത്തിലുള്ള ന്യൂനപക്ഷ-ഭൂരിപക്ഷ വ്യത്യാസവും മാത്രമല്ല. സാമൂഹ്യമായും ഇതിന് പല സ്വാധീനങ്ങളുമുണ്ട്. വ്യക്തികളുടെ ആരോഗ്യം, ആവാസം, വിദ്യാഭ്യാസം, ജീവിത നിലവാരം, സംസ്‌കാരം എന്നിവപോലെ സാമൂഹികമായും മേല്‍പ്പറഞ്ഞതെല്ലാം സ്വാധീനം ചെലുത്തും.

ഈ യാഥാര്‍ത്ഥ്യങ്ങള്‍ക്കു പുറമേ കൃത്രിമമാര്‍ഗ്ഗത്തില്‍ ജനസംഖ്യ കൂട്ടാനും രാഷ്‌ട്രീയ ചേരിയും ശക്തിയും രൂപപ്പെടുത്താനുമുള്ള ആസൂത്രിത പദ്ധതികള്‍കൂടിയുണ്ട്. അതുകൂടി ചര്‍ച്ച ചെയ്യേണ്ടതുണ്ട്. മത പരിവര്‍ത്തനം, നിര്‍ബന്ധിത മതപരിവര്‍ത്തനം, സംഘടിത മതപരിവര്‍ത്തനം എന്നിങ്ങനെ വിവിധ തരത്തിലും തലത്തിലും.

(തുടരും)