തിരുവനന്തപുരം: കുടുംബശ്രീ മുഖേന സംസ്ഥാനത്തു നടപ്പാക്കുന്ന ദീന് ദയാല് ഉപാധ്യായ ഗ്രാമീണ് കൗശല്യ യോജന(ഡിഡിയുജികെവൈ) പദ്ധതി പ്രവര്ത്തനങ്ങള് വിലയിരുത്തുന്നതിനും ഏകോപിപ്പിക്കുന്നതിനും മാനേജ്മെന്റ് ഇന്ഫര്മേഷന് സിസ്റ്റം നിലവില് വന്നു. ആദ്യഘട്ടത്തില് പദ്ധതിയുമായി ബന്ധപ്പെട്ട് സംസ്ഥാനത്തെ വിവിധ പരിശീലനകേന്ദ്രങ്ങളില് നടക്കുന്ന എല്ലാ പ്രവര്ത്തനങ്ങളും ഏകോപിപ്പിക്കുകയും പുരോഗതി വിലയിരുത്തുകയുമാണ് ഇതിന്റെ ലക്ഷ്യം.
സംസ്ഥാനത്തെ ഗ്രാമീണ മേഖലയിലെ നിര്ദ്ധനരായ യുവതീയുവാക്കള്ക്ക് തൊഴില് പരിശീലനവും തൊഴിലും ഉറപ്പു വരുത്തുന്നതാണ് പദ്ധതി. ഇതിന്റെ ഭാഗമായി പരിശീലന പരിപാടികളെ സംബന്ധിച്ച ഏകീകൃത പ്രവര്ത്തന മാനദണ്ഡത്തെ അടിസ്ഥാനമാക്കിയാണ് പുതിയ വെബ് അധിഷ്ഠിത നിരീക്ഷണ സംവിധാനം ഏര്പ്പെടുത്തുന്നത്.
രണ്ടാം ഘട്ടത്തില് പദ്ധതിയില് അംഗമായ പരിശീലനാര്ത്ഥികളുടെ പഠനമേഖല, പരിശീലനകാലാവധി, തൊഴില്ലഭ്യത, ഫണ്ട് വിനിയോഗം എന്നിവ സംബന്ധിച്ച പൂര്ണ വിവരങ്ങള് ഇതില് ലഭ്യമാകും.
പരിശീലനകേന്ദ്രങ്ങളുടെ നിലവാര പരിശോധനയും ഇതുവഴി സാധ്യമാകും. ഇതോടൊപ്പം പദ്ധതിയില് ചേര്ന്നു തൊഴില്പരിശീലനവും തൊഴിലും നേടാന് ആഗ്രഹിക്കുന്ന പരിശീലനാര്ത്ഥികള്ക്ക് രജിസ്ട്രേഷന് നടത്താനുള്ള സൗകര്യവും പുതിയ സംവിധാനത്തിലുണ്ട്. പരിശീലന കേന്ദ്രങ്ങളില് ആധാര് നമ്പറുമായി ബന്ധപ്പെടുത്തി ബയോമെട്രിക് ഹാജര് രേഖപ്പെടുത്താനുളള സംവിധാനം, പഠനം പൂര്ത്തിയാക്കിയ കുട്ടികളുടെ നിലവിലെ സ്ഥിതി മുതലായവ കൂടി ഉള്പ്പെടുത്തുന്നതാണ്.
രാജ്യത്ത് 28 സംസ്ഥാനങ്ങളില് നടപ്പാക്കുന്ന പദ്ധതിയുടെ കേരളത്തിലെ നോഡല് ഏജന്സി കുടുംബശ്രീയാണ്. ഡിഡിയുജികെവൈ മാനേജ്മെന്റ് ഇന്ഫര്മേഷന് സിസ്റ്റത്തിന്റെ ഉദ്ഘാടനം തദ്ദേശ സ്വയംഭരണ മന്ത്രി ഡോ. കെ.ടി ജലീല് നിര്വഹിച്ചു. കുടുംബശ്രീ എക്സിക്യൂട്ടീവ് ഡയറക്ടര് എസ്. ഹരികിഷോര്, അസിസ്റ്റന്റ് പ്രൈവറ്റ് സെക്രട്ടറി എ. സന്തോഷ് കുമാര്, പ്രോഗ്രാം മാനേജര്മാരായ ലിയോ പോള്, ഷിബു, ദാസ് വിന്സെന്റ്, സിഡ്കോയുടെ പ്രതിനിധികളായ മനോജ്, നിഷാദ് തുടങ്ങിയവര് പങ്കെടുത്തു.
