കണ്ണൂര്: കെടിയു വിദ്യാര്ത്ഥികളോടുള്ള സര്ക്കാര് അവഗണന അവസാനിപ്പിക്കുക, മെഡിക്കല് ഫീസ് വര്ദ്ധനവ് പിന്വലിക്കുക തുടങ്ങിയ ആവശ്യങ്ങളുന്നയിച്ച് എബിവിപിയുടെ നേതൃത്വത്തില് കലക്ട്രേറ്റിലേക്ക് നടത്തിയ മാര്ച്ചില് പോലീസ് നരനായാട്ട്. വിദ്യാഭ്യാസ മേഖലയിലെ രൂക്ഷമായ പ്രശ്നങ്ങള് പരിഹരിക്കണമെന്നാവശ്യപ്പെട്ട് എബിവിപി നടത്തിയ മാര്ച്ചില് നൂറുകണക്കിന് വിദ്യാര്ത്ഥികള് പങ്കെടുത്തു. രാവിലെ 11 മണിയോടെ പഴയ ബസ് സ്റ്റാന്റ് പരിസരത്ത് നിന്നാരംഭിച്ച പതിഷേധ മാര്ച്ച് കലക്ട്രേറ്റ് കവാടത്തില് പോലീസ് തടഞ്ഞു. തുടര്ന്ന് മുദ്രാവാക്യം വിളിച്ച വിദ്യാര്ത്ഥികളെ പോലീസ് ഏകപക്ഷീയമായി തല്ലിച്ചതക്കുകയായിരുന്നു. അടികൊണ്ട് ലാത്തി പൊട്ടിയശേഷമാണ് പോലീസ് മര്ദ്ദനത്തില് നിന്ന് പിന്മാറിയത്. ക്രൂരമായ മര്ദ്ദനത്തിന് പരിക്കേറ്റ് വീണ വിദ്യാര്ത്ഥികളെ റോഡില് കൂടി വലിച്ചിഴച്ചാണ് ജീപ്പില് കയറ്റിയത്.
നിരായുധരായി കലക്ട്രേറ്റിലേക്ക് മാര്ച്ച് നടത്തിയ വിദ്യാര്ത്ഥികളെ നേരിടാന് ജലപീരങ്കിയും ടിയര്ഗ്യാസുമുള്പ്പടെ സര്വ്വസന്നാഹങ്ങളുമായാണ് പോലീസ് നിലയുറപ്പിച്ചത്. കണ്ണൂര് പോലീസ് സ്റ്റേഷന് പരിധിക്ക് പുറമെ എആര് ക്യാമ്പില് നിന്നും ജില്ലയിലെ മറ്റ് പോലീസ് സ്റ്റേഷനുകളില് നിന്നും പ്രത്യേകമായി പോലീസ് സംഘത്തെ എത്തിച്ചിരുന്നു. പ്രതിഷേധ ശബ്ദങ്ങളെ അടിച്ചമര്ത്തുകയെന്ന ഇടത് സര്ക്കാരിന്റെ നയം അക്ഷരാര്ത്ഥത്തില് നടപ്പിലാക്കുകയായിരുന്നു പോലീസ് സംഘം. പ്രകടനമായെത്തിയ വിദ്യാര്ത്ഥികളെ കലക്ട്രേറ്റ് ഗേറ്റിന് മുന്നില് ഇരിക്കാനോ പ്രതിഷേധത്തിന് കാരണമായ വിഷയത്തെകുറിച്ച് വിശദീകരിക്കാനോ പോലീസ് അനുവദിച്ചില്ല. ക്രൂരമായ മര്ദ്ദനത്തില് പകച്ചുപോയ വിദ്യാര്ത്ഥികള് ചിതറിയോടുകയായിരുന്നു. സിപിഎം ഗുണ്ടാസംഘങ്ങളെപ്പോലും നാണിപ്പിക്കുന്ന വിധത്തിലാണ് പോലീസ് പെരുമാറിയത്. ജില്ലാ കണ്വീനര് പി.പി.പ്രജു, ജോയിന്റ് കണ്വീനര് അരുണ് ഭാരത്, സംസ്ഥാന സമിതി അംഗങ്ങളായ എന്.പി.ശ്രുതി, സനില്, ജില്ലാ കമ്മിറ്റി അംഗം പ്രയാഗ് തുടങ്ങിയവര് നേതൃത്വം നല്കി.
