തിരുവനന്തപുരം: വ്യാപക വിമര്ശനമുയര്ന്നിട്ടും വീര്യം കുറഞ്ഞ മദ്യത്തിന് നികുതി ഇളവ് നല്കാനുള്ള തീരുമാനവുമായി വി ഡി സതീശന് സര്ക്കാര് മുന്നോട്ട്. ബജറ്റില് അവതരിപ്പിച്ചപ്പോള് കോണ്ഗ്രസ് നേതാക്കളടക്കം വിമര്ശിച്ച നികുതി ഘടന ധനബില്ലിലും പിന്വലിച്ചിട്ടില്ല. ധനബില്ലിന്റെ കരട് പ്രസിദ്ധീകരിച്ചു.അടുത്ത മാസം ഒന്നിന് സഭയില് അവതരിപ്പിക്കും.
ബില് പാസായാലും വീര്യം കുറഞ്ഞ മദ്യത്തിന്റെ വില്പനക്ക് അനുമതി നല്കില്ലെന്നാണ് സര്ക്കാര് അവകാശപ്പെടുന്നത്.പുതിയ ഇനം മദ്യം വിപണിയില് എത്തിക്കണമെങ്കില് എക്സൈസ് അനുമതി ആവശ്യമാണെന്നും സര്ക്കാര് പറയുന്നു.ഘടക കക്ഷികളുമായി മുഖ്യമന്ത്രി വി.ഡി. സതീശന് ആശയ വിനിമയം നടത്തും.
നികുതി ഘടന ഉടന് മാറ്റേണ്ടെന്ന അഭിപ്രായമാണ് മുഖ്യമന്ത്രി വി.ഡി. സതീശനുള്ളത്. വിവാദ മദ്യനയത്തില് മുഖ്യമന്ത്രി വി.ഡി. സതീശനെതിരെ മുതിര്ന്ന കോണ്ഗ്രസ് നേതാവും കെപിസിസി മുന് അധ്യക്ഷനുമായ വി.എം. സുധീരന് രംഗത്തു വന്നത് സര്ക്കാരിനെ പ്രതിസന്ധിയിലാക്കുന്നുണ്ട്. വീര്യം കുറഞ്ഞ മദ്യത്തിന്നികുതി കുറച്ചത് പിന്വലിക്കണമെന്നും ധനബില്ലില് നികുതി ഘടന പാടില്ലെന്നും സുധീരന് ആവശ്യപ്പെട്ടിരുന്നു.
