തലശ്ശേരി: അത്താഴക്കൂട്ടം, ജനമൈത്രി പോലീസ് എന്നിവയുടെ ആഭിമുഖ്യത്തില് നടന്നുവരുന്ന ഭിക്ഷാടന വിമുക്ത തലശ്ശേരി എന്ന പദ്ധതിയോടൊപ്പം വ്യാപാരി വ്യവസായി ഏകോപന സമിതിയും ചേര്ന്നു പ്രവര്ത്തനം ഊര്ജ്ജിതമാക്കുന്നതാണെന്ന് സംഘാടകര് വാര്ത്താ സമ്മേളനത്തില് പറഞ്ഞു.
തലശ്ശേരിയില് കഴിഞ്ഞ മൂന്ന് വര്ഷമായി വിശപ്പ് രഹിത ഭിക്ഷാടന വിമുക്ത പദ്ധതി നടന്നുവരികയാണ്. ഇതിനായി സംഗമം ജംഗ്ഷനിലുള്ള പാര്ക്ക് വ്യൂ ഹോട്ടലിന് മുന്നിലായി സ്ഥാപിച്ച സൗജന്യഫുഡ് ഫ്രീസര്വഴി ദിനംപ്രതി ഇരുന്നൂറിലധികം ആളുകള്ക്ക് ഭക്ഷണം നല്കുന്നുണ്ട്. കൂടാതെ ഇവരുടെ കൂട്ടത്തില് നിരാലംബരായവരെയും അഗതികളെയും കണ്ടെത്തി സംരക്ഷണവും ചികിത്സാ സഹായവും പാര്പ്പിടവും ഒരുക്കുകയും ചെയ്യുന്നുണ്ട്.
തലശ്ശേരിയില് ഭിക്ഷയാചിക്കുന്നവര്ക്ക് ഒരു ദിവസം ശരാശരി 850 രൂപമുതല് 1000 രൂപവരെ ലഭിക്കുന്നുണ്ട്. ഭിക്ഷാടനം നടത്തുന്ന ഒരാള് മകനെ മലേഷ്യയില് എംബിഎക്ക് പഠിപ്പിക്കുന്നുണ്ട്. മറ്റൊരാള്മാസം പ്രതി 30000രൂപ ഓണ്ലൈനായി വീട്ടിലേക്ക് അയക്കുന്നുണ്ട്. ഒരു സ്ത്രീ ദിനം പ്രതി ഒരു ബേക്കറിയില് സൂക്ഷിക്കാന് 850 രൂപ വീതം നല്കിവരുന്നുണ്ട്. കൂടാതെ കേരളത്തിലെ ഒരു പ്രമുഖ നടിയുടെ അമ്മാവനും തലശ്ശേരിയില് ഭിക്ഷാടനം നടത്തുന്നുണ്ട്.
ഇത്തരം കാര്യങ്ങള് അത്താഴക്കൂട്ടം സ്ഥാപിച്ച സൗജന്യ ഫുഡ് ഫ്രീസറിനുടത്ത് സ്ഥാപിച്ച് സിസിടിവി കാണാന് കഴിഞ്ഞവരുടെ ദൃശ്യങ്ങളിലുടെ നടത്തിയ അന്വേഷണത്തിലൂടെയാണ് മനസ്സിലാക്കാന് കഴിഞ്ഞത്. ഇതിനെല്ലാം പുറമെ മറ്റു ജില്ലകളിലും സംസ്ഥാനങ്ങളിലും ക്രിമിനല് കേസുകളില്പ്പെട്ട കുറ്റവാളികളുണ്ട്.
അതിനാല് തലശ്ശേരിയില് ഒരു കാരണവശാലും ആരും ഭിക്ഷയാചിച്ച് എത്തുന്നവര്ക്ക് പണം നല്കരുത്. പകരം ഭക്ഷണം മാത്രമാണ് നല്കേണ്ടത്. എങ്കില് മാത്രമേ ഭിക്ഷാടന മാഫിയയെ തലശ്ശേരിയില് നിന്ന് അകറ്റാനും കുട്ടികളെ തട്ടിക്കൊണ്ടുപോകുന്ന സംഘത്തെ പ്രതിരോധിക്കാനും കഴിയുകയുള്ളൂ. ഇതിനായി ഇന്നുമുതല് തലശ്ശേരിയില് പോസ്റ്റര് പ്രചരണം ആരംഭിക്കുന്നതാണെന്ന് സംഘാടകര് പറഞ്ഞു. വാര്ത്താ സമ്മേളനത്തില് ഷാംറീസ് ബേക്കര്, ജവാദ് അഹമ്മദ്, സാക്കീര് കാത്താണ്ടി, പ്രസാദ്, എഎസ്ഐ നജീബ് എന്നിവര് പങ്കെടുത്തു.
