കുറവിലങ്ങാട്: അധ്യാപകനായിരുന്ന മുത്തഛന്റെ ഓര്മ്മദിനത്തില് പഠനത്തില് സമര്ത്ഥരായ 25 നിര്ധനവിദ്യാര്ത്ഥികള്ക്ക് ലാപ്ടോപ്പുകള് സമ്മാനിക്കുകയാണ് അമേരിക്കയില് ജനിച്ചുവളര്ന്ന കുറവിലങ്ങാട് വെള്ളായിപ്പറമ്പില് കെവിന്കുര്യന് എന്ന 15 കാരന്.
മംഗലാപുരം വിവേകാനന്ദ കോളേജില് മൂന്നുപതിറ്റാണ്ടുകാലം അധ്യപകജോലിനോക്കിയ പ്രൊഫ. വി.യു കുര്യന്റെ ഒന്നാം ഓര്മ്മദിനമായ നാളെ(13.7.2017)യാണ് കുറവിലങ്ങാട് സെന്റ്മേരീസ് ബോയീസ്, ഗേള്സ് ഹൈസ്കൂളുകളിലെ പഠനത്തില് സമര്ത്ഥരായ 25 വിദ്യാര്ത്ഥികള്ക്ക് ലാപ്ടോപ്പ് സമ്മാനമായി ലഭിക്കുക. വെള്ളായിപ്പറമ്പില് ജോയുടെ മകനായ കെവിന് അമേരിക്കയിലെ സിന്സ്ബെറിയില് ജോണ്ഹോപ്കിന്സ് യൂണിവേഴ്സിറ്റിയിലെ ലോ ആന്ഡ് പൊളിറ്റിക്സ് വിദ്യാര്ത്ഥിയാണ്.
പഠനത്തിനിടയിലെ ഒഴിവുവേളകളില് ജോലിചെയ്ത് സമ്പാദിച്ച പണം വിനിയോഗിച്ചാണ് ലാപ്ടോപ്പുകള് വാങ്ങിവിതരണം ചെയ്യുന്നത്. പ്രൊജക്ട് ലിസ എന്നാണ് ഈ പദ്ധതിക്ക് പേരിട്ടിരിക്കുന്നത്. വ്യാഴാഴ്ച ഉച്ചകഴിഞ്ഞ് 3ന് കുറവിലങ്ങാട് മര്ത്ത്മറിയം ഫൊറോനാപള്ളി പാരീഷ് ഹാളില് നടക്കുന്ന അനുസ്മരണസമ്മേളനത്തില് ലാപ് ടോപ്പ് വിതരണം പാലാ രൂപതാസഹായമെത്രാന് ജേക്കബ്ബ് മുരിയ്ക്കന് നിര്വ്വഹിക്കും. വികാരി .ഡോ. ജോസഫ് തടത്തില് അധ്യക്ഷനാവും മോന്സ്ജോസഫ് എംഎല്എ സമ്മേളനം ഉദ്ഘാടനം ചെയ്യും.
