കണ്ണൂര്: നെഹ്റുഗ്രൂപ്പ് ചെയര്മാന് പ്രതിയായ കേസ് ഒത്തുതീര്പ്പാക്കാന് മധ്യസ്ഥത വഹിച്ച കോണ്ഗ്രസ്സ് നേതാവ് കെ.സുധാകരനെ തള്ളി ജില്ലാ കോണ്ഗ്രസ്സ് കമ്മറ്റി. പാമ്പാടി നെഹ്റു കോളേജുമായി ബന്ധപ്പെട്ട വിഷയത്തില് കോണ്ഗ്രസ്സ് നിലപാടില് മാറ്റമില്ലെന്നും സുധാകരന് കോളേജ് അധികൃതരുമായി ചര്ച്ച നടത്തിയത് ജില്ലാ കോണ്ഗ്രസ്സ് നേതൃത്വത്തിന് അറിയില്ലെന്നുമാണ് ജില്ലയിലെ മുതിര്ന്ന കോണ്ഗ്രസ്സ് നേതാവ് പ്രതികരിച്ചത്. കഴിഞ്ഞ ദിവസം ചെര്പ്പുള്ളശ്ശേരിയില് നെഹ്റുഗ്രൂപ്പ് ചെയര്മാന് കൃഷ്ണദാസിന്റെ ചെയര്മാന് കൃഷ്ണദാസിന്റെ സഹോദരന് കൃഷ്ണകുമാര്, പിആര്ഒ പ്രേംകുമാര് എന്നിവരുമായി ചര്ച്ച നടത്തുന്നതിനിടയില് ബിജെപി, സിപിഎം പ്രവര്ത്തകര് തടഞ്ഞുവെച്ചിരുന്നു. സംഭവം വിവാദമായതോടെ കെപിസിസി സുധാകരനില് നിന്ന് വിശദീകരണം ആവശ്യപ്പെട്ടിരുന്നു. കോണ്ഗ്രസ്സിന്റെ സംഘടനാ രംഗത്ത് സജീവമല്ലാത്ത സുധാകരന് കേരളത്തില് വിവാദമായ ചര്ച്ചകള്ക്ക് വഴിവെച്ച നെഹ്റു കോളേജ് വിഷയത്തില് മധ്യസ്ഥത വഹിച്ചത് ജില്ലാ നേതൃത്വത്തെ അങ്കലാപ്പിലാക്കിയിട്ടുണ്ട്. നേരത്ത മണല് മാഫിയകള്ക്ക് വേണ്ടി വളപട്ടണം പോലീസ് സ്റ്റേഷനിലെത്തി എസ്ഐയെ ഭീഷണിപ്പെടുത്തിയത് ഏറെ വിവാദമായിരുന്നു. നേരത്തെയും സുധാകരന് നിരവധി വിവാദ വിഷയങ്ങളില് ഇടപെട്ടിരുന്നുവങ്കിലും തന്റെ ആജ്ഞാനുവര്ത്തികളായവരെ നോക്കുകുത്തിയാക്കി സംഘടനാ നടപടികളില് നിന്ന് ഒഴിവാകുകയായിരുന്നു.
യുഡിഎഫിന്റെ കുത്തക സീറ്റായിരുന്ന കണ്ണൂര് നിയോജക മണ്ഡലവും കണ്ണൂര് കോര്പറേഷനും പരാജയപ്പെട്ടത് സുധാകരന്റ പിടിവാശിയും പിടിപ്പുകേടും കൊണ്ടാണെന്നാണ് കോണ്ഗ്രസ്സിലെ വലിയ വിഭാഗവും വിശ്വസിക്കുന്നത്. വര്ഷങ്ങളായി കെ.സുധാകരന്റെ ഇംഗിതത്തിനൊത്ത് പ്രവര്ത്തിക്കുന്നവരാണ് ജില്ലയില് കോണ്ഗ്രസ്സ് നേതൃനിരയില് അവരോധിക്കപ്പെടുന്നത്. നിലവിലെ കോണ്ഗ്രസ്സ് ജില്ലാ നേതൃത്വം കെ.സുധാകരന്റെ ആജ്ഞാനവര്ത്തികളായതിനാല് നേരിട്ട് വിശദീകരണം ചോദിക്കാന് സാധ്യതയില്ല. ഡിസിസി പ്രസിഡണ്ട് സതീശന് പാച്ചേനിയാകട്ടെ സുധാകരന്റെ താല്പര്യപ്രകാരം എ ഗ്രൂപ്പ് വിട്ട് ഐ ഗ്രൂപ്പില് ചേക്കേറിയ ആളാണ്. എന്നാല് കെപിസിസി നേതൃത്വം തന്നെ നേരിട്ട് വിശദീകരണം ചോദിച്ച സാഹചര്യത്തില് സുധാകരനെതിരെ നടപടിയുണ്ടാകുമെന്ന പ്രതിക്ഷയിലാണ് സുധാകര വിരുദ്ധ ഗ്രൂപ്പ്.
