കാസര്കോട്: കാസര്കോടെത്തിയ കര്ണ്ണാടകയിലെ ശൃംഗേരി മഠാധിപതി ജഗദ്ഗുരു ശ്രീ ഭാരതീതീര്ത്ഥ സ്വാമികള്ക്ക് വീരോചിതമായ വരവേല്പ്പ് നല്കി.
കാസര്കോട് മല്ലികാര്ജുന ക്ഷേത്ര പരിസരത്തെത്തിയ ഭാരതീതീര്ത്ഥ സ്വാമികളെയും അദ്ദേഹത്തിന്റെ പ്രധാന ശിഷ്യന് ശ്രീ വിദുശേഖര ഭാരതിയെയും നിരവധി വാഹനങ്ങളുടെ അകമ്പടിയോടെ നുള്ളിപ്പാടി അയ്യപ്പ ഭജന മഠം പരിസരത്തേക്ക് സ്വീകരിച്ച് ആനയിച്ചു.
നുള്ളിപ്പാടി അയ്യപ്പ ഭജന മഠം പരിസരത്ത് നിന്നും പൂര്ണ്ണകുംഭം നല്കി വാദ്യഘോഷങ്ങളുടെ അകമ്പടിയോടെ നൂറുകണക്കിന് ഭക്തര് ചേര്ന്ന് സ്വാമിയെ അണങ്കൂര് ശ്രീ ശാരദാംബാ ഭജന മന്ദിരത്തിലേക്ക് വരവേറ്റു.
ഭജനമന്ദിരത്തിന് വേണ്ടി നിര്മ്മാണം പൂര്ത്തിയാക്കിയ മേല് മാട് ഭാരതീതീര്ത്ഥ സ്വാമികള് ഭക്തജനങ്ങള്ക്ക് സമര്പ്പിച്ചു. ഇന്ന് രാവിലെ ഒമ്പത് മണിക്ക് ഭാരതീതീര്ത്ഥ സ്വാമിയുടെയും വിദുശേഖര ഭാരതിയുടെയും പാദപൂജയും ഭിക്ഷാവന്ദനവും ഉണ്ടാകും. ഭക്തരെ ആശിര്വചിച്ചതിന് ശേഷം അദ്ദേഹം മൂഡിബദ്രിയിലേക്ക് മടങ്ങും.
തലപ്പാടി വരെ സംഘാടകര് അനുഗമിക്കും. വഴിമദ്ധ്യേ ആരിക്കാടി ഹനുമാന് ക്ഷേത്രത്തിലും ചെറുകാണി സദാശിവക്ഷേത്രത്തിലും ഭാരതീതീര്ത്ഥ സ്വാമികള് സന്ദര്ശിക്കും.
