ആലപ്പുഴ: തിരുമല വാര്‍ഡില്‍ കൊമ്പന്‍കുഴി പാടശേഖരത്തില്‍ വെള്ളം കയറ്റിയതുമൂലം ജനജീവിതം ദുസ്സഹമായി. പല വീടുകളിലും വെള്ളം കയറി.
കൃഷിക്കുശേഷം ഉപേക്ഷിച്ച നെല്ലും വൈക്കോലും എലികളും ഇഴജന്തുക്കളും ചത്തുചീഞ്ഞും കീടനാശിനികളുടെ മിച്ചവും കൂടിക്കലര്‍ന്ന് ദുര്‍ഗന്ധം പരത്തുന്ന മലിനജലമാണ് പാടത്ത് നിറഞ്ഞുകിടക്കുന്നത്. ഡെങ്കിപ്പനി, കോളറ തുടങ്ങിയ പകര്‍ച്ചവ്യാധികള്‍ പടര്‍ന്നുപിടിക്കാനുള്ള സാദ്ധ്യതകളും ഇവിടെ ഏറയാണ്.
എല്ലായിനം കൊതുകുകളുടെയും രോഗാണുക്കളുടെയും ഈറ്റില്ലമായി എല്ലാവര്‍ഷവും മഴക്കാലത്ത് ജനജീവിതം ദുസ്സഹമാക്കുന്നതിനെതിരെ നാട്ടുകാര്‍ ഹൈക്കോടതിയെ സമീപിച്ചിരുന്നു. കൃഷിയാവശ്യത്തിന് വരമ്പിനു മുകളില്‍ വെള്ളം കയറ്റാതിരിക്കാനും അധികജലം വറ്റിച്ചുകളയുന്നതിന് സ്ഥിരം വൈദ്യുതിബന്ധം നിലനിര്‍ത്താനും ബണ്ടുനിവാസികള്‍ക്ക് ബുദ്ധിമുട്ടുണ്ടാകരുതെന്നും കോടതി നിര്‍ദ്ദേശിച്ചു.
ഈ നിര്‍ദ്ദേശങ്ങള്‍ക്കനുസരിച്ച് നടപടിയെടുക്കാന്‍ സംസ്ഥാന സര്‍ക്കാരിനോട് കോടതി ആവശ്യപ്പെട്ടു. എന്നാല്‍ ഇതൊന്നും നടപ്പായില്ല.
