ചെറുതോണി: സുഹൃത്തിന്റെ വീടെന്നു കരുതി വീടുമാറി കയറിയ യുവാവിനെ നാട്ടുകാര് ഓടിച്ചു. രക്ഷപെടാന് തെങ്ങില്കയറിയ യുവാവ് മൂന്നര മണിക്കൂറോളം ജനങ്ങളെ പരിഭ്രാന്തിയിലാക്കി.
കുഞ്ചിത്തണ്ണി പണ്ടാരക്കുന്നേല് അഗസ്റ്റിന് (കുട്ടായി-40)ണ് തെങ്ങില് കയറി രക്ഷപെടാന് ശ്രമം നടത്തിയത്. ഇന്നലെരാവിലെ 9.30 യോടെയാണ് സംഭവം. എട്ട് വര്ഷം മുന്പ് പഴയരിക്കണ്ടത്ത് വന്നിട്ടുള്ള കുട്ടായി ഇന്നലെ സുഹൃത്തിനെ കാണാന് എത്തിയതായിരുന്നു. എന്നാല് പഴയരിക്കണ്ടം ഗ്രാമത്തിനുണ്ടായിട്ടുള്ള വികസനം കുട്ടായിയുടെ വഴിതെറ്റിച്ചു.
അതിക്രമിച്ച് വീട്ടില് കയറിയ കുട്ടായി കള്ളനാണെന്ന ധാരണയില് നാട്ടുകാരും വീട്ടുകാരും വിരട്ടി ഓടിക്കുകയാണുണ്ടായത്. തെങ്ങുകയറ്റക്കാരനായ ഇയാള് രക്ഷപെടാന് പഴയരിക്കണ്ടം എഫ്.സി കോണ്വെന്റ് പുരയിടത്തിലെ തെങ്ങിലാണ് അഭയം തേടിയത്. തെങ്ങില് ഒരാള് കയറിയിരിക്കുന്നതായി ശ്രദ്ധയില്പെട്ട മഠം അധികൃതര് കഞ്ഞിക്കുഴി പോലീസില് വിവരമറിയിച്ചു.
എസ്.ഐ ലോറന്സിന്റെ നേതൃത്വത്തില് പോലീസ് ഇയാളെ അനുനയിപ്പിച്ച് താഴെയിറക്കാന് ശ്രമിച്ചെങ്കിലും സാധിച്ചില്ല. തുടര്ന്ന് ഇടുക്കിയില് നിന്നും ഫയര്ഫോഴ്സ് എത്തി. എന്നാല് 75 അടിയിലേറെ ഉയരമുള്ള തെങ്ങില് ഇവരുടെ കൈവശമുണ്ടായിരുന്ന ഗോവണി എത്തുമായിരുന്നില്ല. ഇതെതുടര്ന്ന് പ്രദേശത്തെ തെങ്ങുകയറ്റക്കാരനായ കുറ്റിപ്പാലക്കല് ജോണ് മാത്യുവിനെവരുത്തി.
ജോണ് തെങ്ങില് കയറി കുട്ടായിയെ കയറിനുകെട്ടി താഴെയിറക്കുകയായിരുന്നു. മണിക്കൂറോളം തെങ്ങില് കഴിഞ്ഞ കുട്ടായി അവശനിലയിലായിരുന്നു. കുട്ടായിയെ കാണാന് ധാരാളം പേര് സ്ഥലത്തെത്തിയിരുന്നു. തുടര്ന്ന് ഇയാളെ ബന്ധുവിനൊപ്പം വിടുകയായിരുന്നു. മുകളിലെത്തിയപ്പോള് താഴെ വീഴാതിരിക്കാന് മുണ്ട് ഉരിഞ്ഞ് അരയില്ക്കെട്ടി മറുഭാഗം തെങ്ങോലയില് കെട്ടിയത് രക്ഷയായതായി പോലീസ് പറഞ്ഞു. കഞ്ഞിക്കുഴി സിഐ വര്ഗീസ് ജോര്ജും സ്ഥലത്തെത്തിയിരുന്നു.
