കോട്ടയം: സാമൂഹിക സേവനരംഗത്ത് മികച്ച പ്രവര്ത്തനം കാഴ്ചവയ്ക്കുന്ന സംഘടനകള്ക്ക് ഏര്പ്പെടുത്തിയിട്ടുള്ള ഉത്തിഷ്ഠ സേവാ പുരസ്കാരത്തിന് ചങ്ങനാശ്ശേരി കേന്ദ്രീകരിച്ച് പ്രവര്ത്തിക്കുന്ന സുകൃതം ചാരിറ്റബിള് ട്രസ്റ്റ് അര്ഹമായി. ബംഗളൂരുവിലെ സന്നദ്ധസംഘടനയായ ‘ഉത്തിഷ്ഠ’യാണ് ഒരുലക്ഷം രൂപയും ഫലകവും പ്രശസ്തിപത്രവും ഉള്പ്പെടുന്ന പുരസ്കാരം ഏര്പ്പെടുത്തിയത്.
സാമൂഹിക രംഗത്ത് നിരവധി സേവനപ്രവര്ത്തനങ്ങളാണ് ‘സുകൃതം’ ചെയ്തുവരുന്നത്. തെരുവില് അലഞ്ഞുതിരിയുന്ന രോഗികളെ പുനരധിവസിപ്പിക്കുന്ന സുകൃതം ചാരിറ്റബിള് ട്രസ്റ്റ് 2014ലാണ് സാമൂഹിക സേവനരംഗത്തേക്ക് പ്രവേശിച്ചത്. സാമ്പത്തിക വെല്ലുവിളി നേരിടുന്ന വിദ്യാര്ത്ഥികള്ക്ക് പഠനസഹായ വിതരണം, ഭിന്നശേഷിയുള്ളവര്ക്ക് ഉപകരണ വിതരണം, ചങ്ങനാശേരി താലൂക്ക് ആശുപത്രിയിലെ രോഗികള്ക്ക് എല്ലാ ഞായറാഴ്ചയും സൗജന്യ ഭക്ഷണവിതരണം എന്നിവ സുകൃതത്തിന്റെ നേതൃത്വത്തില് മുടക്കമില്ലാതെ നടന്നുവരുന്നു.
നാളെ ബംഗളൂരുവിലെ ഇന്ദിരാ നഗര് എന്ഡികെ കല്യാണ് മന്ദിറില് നടക്കുന്ന ചടങ്ങില് നിംഹാന്സ് ഡയറക്ടര് പ്രൊഫ. ബി. എന്. ഗംഗാധരന് പുരസ്കാരം സമ്മാനിക്കും. ന്യൂ ഇന്ത്യ അഷ്വറന്സ് കമ്പനി ഡെപ്യൂട്ടി ജനറല് മാനേജര് ഡോ. ചിരഞ്ജീവി സന്ന റെഡ്ഡി മുഖ്യാതിഥിയായിരിക്കും.
പുരസ്കാര വിതരണത്തിന്റെ ഭാഗമായി പച്ചവേഷങ്ങളിലൂടെ ആസ്വാദകമനം കവര്ന്ന കലാമണ്ഡലം ഗോപിയും സംഘവും അവതരിപ്പിക്കുന്ന ‘രുഗ്മാംഗദ ചരിതം’ കഥകളിയും അരങ്ങേറും. രുഗ്മാംഗദനായി കലാമണ്ഡലം ഗോപിയും, മോഹിനിയായി മാര്ഗി വിജയകുമാറും വേഷമിടും. ചടങ്ങിലേക്കുള്ള പ്രവേശനം പാസുമൂലം നിയന്ത്രിച്ചിട്ടുണ്ടെന്ന് സംഘാടകര് അറിയിച്ചു. പാസുകള്ക്ക് 9880533597 നമ്പരില് ബന്ധപ്പെടണം.
