ഇന്ത്യന് വെല്സ്: ഇന്ത്യന് വെല്സ് ടെന്നീസ് ചാമ്പ്യന്ഷിപ്പില് ക്ലാസ്സിക്ക് പോരാട്ടം വരുന്നു. ടെന്നീസ് ഇതിഹാസങ്ങളായ റോജര് ഫെഡററും റാഫേല് നദാലുമാണ് നാലാം റൗണ്ടില് നേര്ക്കുനേര് ഏറ്റുമുട്ടുന്നത്. കഴിഞ്ഞ ഓസ്ട്രേലിയന് ഓപ്പണിന്റെ ഫൈനലില് ഇരുവരും നേര്ക്കുനേര് വന്നപ്പോള് വിജയം ഫെഡറര്ക്കൊപ്പമായിരുന്നു. ആ പരാജയത്തിന് പകരം വീട്ടുകയാണ് നദാലിന്റെ ലക്ഷ്യം.
ഇന്നലെ നടന്ന മൂന്നാം റൗണ്ട് പോരാട്ടത്തില് ഒമ്പതാം സീഡ് ഫെഡറര് അമേരിക്കയുടെ സ്റ്റീവ് ജോണ്സണെ 7-6 (7-3), 7-6 (7-4) എന്ന നേരിട്ടുള്ള സെറ്റുകള്ക്ക് തോല്പ്പിച്ചാണ് നാലാം റൗണ്ടിലെത്തിയത്. നദാലാകട്ടെ നാട്ടുകാരനും 25-ാം സീഡുമായ ഫെര്ണാണ്ടോ വെര്ഡാസ്കോയെ തോല്പ്പിച്ചാണ് ഫെഡററുമായുള്ള ക്ലാസ്സിക്ക് പോരാട്ടത്തിന് യോഗ്യത േനടിയത്. 6-3, 7-5 എന്ന നേരിട്ടുള്ള സെറ്റുകള്ക്കായിരുന്നു നദാലിന്റെ വിജയം.
അര്ജന്റീനയുടെ ജുവാന് ഡെല് പോട്രോയെ മൂന്ന് സെറ്റ് നീണ്ട പോരാട്ടത്തിനൊടുവില് കീഴടക്കി ലോക രണ്ടാം നമ്പര് സെര്ബിയയുടെ നൊവാക് ദ്യോക്കോവിച്ചും നാലാം റൗണ്ടില് ഇടംപിടിച്ചു. സ്കോര് 7-5, 4-6, 6-1. ഓസ്ട്രേലിയയുടെ നിക്ക് കിര്ഗിയോസാണ് അടുത്ത റൗണ്ടില് ദ്യോക്കോയുടെ എതിരാളി. അമേരിക്കയുടെ ജാക്ക് സോക്ക്, ഡൊണാള്ഡ് യങ്, ടുണീഷ്യയുടെ മാലെക് ജെസീരി എന്നിവരും നാലാം റൗണ്ടിലെത്തിയിട്ടുണ്ട്.
വനിതാ സിംഗിള്സില് ചെക്ക് റിപ്പബ്ലിക്കിന്റെ കരോലിന പ്ലിസ്കോവ, 7-ാം സീഡ് സ്പെയിനിന്റെ ഗാര്ബിനെ മുഗുരുസ, എട്ടാം സീഡ് റഷ്യയുടെ സ്വറ്റ്ലാന കുസ്നെറ്റ്സോവ, 12-ാം സീഡ് അമേരിക്കയുടെ വീനസ് വില്ല്യംസ്, 13-ാം സീഡ് ഡാനിഷ് സുന്ദരി കരോലിന വോസ്നിയാക്കി, 14-ാം സീഡ് റഷ്യന് താരം എലേന വെസ്നിന, 19-ാം സീഡ് അനസ്താസിയ പാവ്ലുചെങ്കോ, ഫ്രാന്സിന്റെ ക്രിസ്റ്റിന മെലഡോവിക്ക് എന്നിവര് ക്വാര്ട്ടര് ഫൈനലിലെത്തി.
അതേസമയം വനിതാ ഡബിള്സില് സാനിയ സഖ്യം ക്വാര്ട്ടറില് പുറത്തായി. ആറാം സീഡ് സ്വിറ്റ്സര്ലന്ഡിന്റെ മാര്ട്ടിന ഹിംഗിസ്-ചൈനീസ് തായ്പേയിയുടെ ചാന് യുങ് യാന് സഖ്യത്തോട് നേരിട്ടുള്ള സെറ്റുകള്ക്കാണ് സാനിയ-ബാര്ബോറ സ്ട്രൈക്കോവ സഖ്യം തോറ്റത്. സ്കോര്: 6-4, 6-4.
