ലണ്ടന്: ചാമ്പ്യന്സ് ലീഗ് ഫുട്ബോളില് ചരിത്രം കുറിച്ച് ലെസ്റ്റര് സിറ്റി ക്വാര്ട്ടറില്. ഇന്നലെ നടന്ന രണ്ടാം പാദ പ്രീ ക്വാര്ട്ടറില് സ്പാനിഷ് വമ്പന്മാരായ സെവിയയെ മറുപടിയില്ലാത്ത രണ്ട് ഗോളുകള്ക്ക് അട്ടിമറിച്ചാണ് ലെസ്റ്റര് ചരിത്രത്തിലാദ്യമായി ചാമ്പ്യന്സ് ലീഗിന്റെ അവസാന എട്ടില് ഇടംപിടിച്ചത്. ആദ്യമായാണ് ലെസ്റ്റര് ചാമ്പ്യന്സ് ലീഗില് കളിക്കുന്നത്. കഴിഞ്ഞ സീസണില് ആദ്യമായി ഇംഗ്ലീഷ് പ്രീമിയര് ലീഗ് കിരീടം ചൂടിയതിനെ തുടര്ന്നാണ് ലെസ്റ്റര് ചാമ്പ്യന്സ് ലീഗിലേക്ക് യോഗ്യത നേടിയത്.
ആദ്യപാദത്തില് 2-1ന് സെവിയയോട് പരാജയപ്പെട്ട ലെസ്റ്ററിന് ക്വാര്ട്ടറില് കടക്കാന് മികച്ച വിജയം അനിവാര്യമായിരുന്നു. ഇത് മനസ്സില് കണ്ട് കളിക്കാനിറങ്ങിയ ലെസ്റ്റര് എതിരാളികളെ തുടക്കം മുതലേ വിറപ്പിച്ചു. ഇരുപാദങ്ങളിലുമായി 3-2ന്റെ വിജയവുമായാണ് ലെസ്റ്റര് അടുത്ത ഘട്ടത്തിലേക്ക് കുതിച്ചത്.
പ്രീമിയര് ലീഗിലെ മോശം പ്രകടനത്തെ തുടര്ന്ന് കോച്ച് റെയ്നേരിയെ പുറത്താക്കിയശേഷം കളിച്ച മൂന്ന് കളികളിലും ലെസ്റ്ററിന് ജയിക്കാന് കഴിഞ്ഞു. റെയ്നേരിയുടെ സഹായയായിരുന്ന ക്രെയ്ഗ് ഷേക്സ്പിയറാണ് നിലവില് അവരുടെ കോച്ച്. പന്തടക്കത്തില് ലെസ്റ്ററിനെ അപേക്ഷിച്ച് സെവിയ ഏറെ മുന്നിലായിരുന്നു. കളിയുടെ 79 ശതമാനവും അവര് പന്ത് നിയന്ത്രിക്കുകയും ചെയ്തു. എന്നാല് മികച്ച മുന്നേറ്റങ്ങളും ഷോട്ടുകളും പായിച്ചത് ലെസ്റ്ററായിരുന്നു. 13 തവണ അവര് എതിര് പോസ്റ്റ് ലക്ഷ്യം വച്ചപ്പോള് സെവിയ 11 തവണ. കളിയുടെ 74-ാം മിനിറ്റില് സെവിയയുടെ സമിര് നസ്രി ചുവപ്പുകാര്ഡ് കണ്ട് പുറത്തുപോയതും അവര്ക്ക് തിരിച്ചടിയായി.
കളിയുടെ തുടക്കത്തില് തന്നെ സെവിയക്ക് ഗോളവസരം കിട്ടി.
എന്നാല് സമിര് നസ്രി പായിച്ച ഷോട്ട് ലെസ്റ്റര് ഗോളി രക്ഷപ്പെടുത്തി. ഇടയ്ക്ക് ലെസ്റ്ററിനും ചില അവസരങ്ങള് ലഭിച്ചെങ്കിലും മുതലാക്കാനായില്ല. കളിയുടെ 27-ാം മിനിറ്റില് ലെസ്റ്റര് ലീഡ് നേടി. റിയാസ് മഹ്രെസിന്റെ പാസ് സ്വീകരിച്ച് വെസ് മോര്ഗന് പായിച്ച ഷോട്ടാണ് സെവിയ വലയില് കയറിയത്. 38-ാം മിനിറ്റില് ഡാനിയേല് ഡ്രിങ്ക്വാട്ടറുടെ ഷോട്ട് സെവിയ ഗോളി രക്ഷപ്പെടുത്തി. പകുതി സമയത്ത് ലെസ്റ്റര് 1-0ന് മുന്നില്.
53-ാം മിനിറ്റില് സെവിയയുടെ സെര്ജിയോയുടെ ബോക്സിന് പുറത്തുനിന്നുള്ള തകര്പ്പന് ഷോട്ട് ക്രോസ്ബാറിലിടിച്ച് മടങ്ങി. തൊട്ടുപിന്നാലെ ലെസ്റ്റര് ലീഡ് ഉയര്ത്തി. ഷിന്ജി ഒകസാകയുടെ ഷോട്ട് പ്രതിരോധതാരം ബ്ലോക്ക് ചെയ്തു. എന്നാല് കാത്തുനിന്ന മാര്ക് അല്ബ്രൈറ്റന് റീബൗണ്ട് പന്ത് വലയിലെത്തിച്ചു (2-0). തുടര്ന്നും ഇരുടീമുകളും മികച്ച ഫുട്ബോള് കളിച്ചു. 80-ാം മിനിറ്റില് സെവിയക്ക് അനുകൂലമായി ലഭിച്ച പെനാല്റ്റി നഷ്ടം. സ്റ്റീവന് നോന്സിയുടെ ഷോട്ട് ലെസ്റ്റര് ഗോളി രക്ഷപ്പെടുത്തുകയായിരുന്നു. പിന്നീട് 86, 88 മിനിറ്റുകളില് ലെസ്റ്ററിന്റെ സൂപ്പര്താരം ജെര്മി വാര്ഡി രണ്ട് അവസരങ്ങള് നഷ്ടപ്പെടുത്തി. ഇതിനിടെ സെവിയയും മികച്ച ചില അവസരങ്ങള് സൃഷ്ടിച്ചെങ്കിലും ഫിനിഷിങ്ങിലെ പോരായ്മ അവരെ തോല്വിയിലേക്ക് തള്ളിയിട്ടു.
