നമ്പ്യാകുളം: ദേശീയ ന്യൂനപക്ഷ കമ്മീഷന് വൈസ് ചെയര്മാനായി കേന്ദ്രസര്ക്കാര് നിയമിച്ച അഡ്വ. ജോര്ജ്ജ് കുര്യന് ജന്മനാട് സ്നേഹോഷ്മള വരവേല്പ്പ് നല്കി.
കേരളത്തില് നിന്ന് ആദ്യമായിട്ടാണ് ദേശീയ ന്യൂനപക്ഷ കമ്മീഷന് വൈസ് ചെയര്മാന് സ്ഥാനത്തേക്ക് ജനനേതാക്കള് തെരഞ്ഞെടുക്കപ്പെടുന്നത്. കേന്ദ്രസര്ക്കാരിന്റെ കീഴില് ഏഴ് അംഗങ്ങളുള്ള സമിതിയുടെ ചെയര്മാന് ഉത്തര്പ്രദേശില് നിന്നുള്ള ഹസന് റസ്ബിയാണ്.
നമ്പ്യാകുളം പള്ളി വികാരി ഫാ. മാത്യു പാറത്തൊട്ടി ജോര്ജ്ജ് കുര്യനെ പൊന്നാട അണിയിക്കുകയും പൂച്ചെണ്ട് നല്കി ആദരിക്കുകയും ചെയ്തു.
ഡോ. മാത്യു കുഴിപ്പള്ളിലിന്റെ അദ്ധ്യക്ഷതയില് സെന്റ്തോമസ് പാരിഷ് ഹാളില് ചേര്ന്ന സമ്മേളനം ജോസ് കെ. മാണി എം.പി. ഉദ്ഘാടനം ചെയ്തു. മോന്സ് ജോസഫ് എംഎല്എ ഉപഹാരസമര്പ്പണം നടത്തി.
മുന് ജില്ലാ കളക്ടര് പി.ജി. തോമസ്, മുന് എം.എല്.എ. സ്റ്റീഫന് ജോര്ജ്ജ്, പഞ്ചായത്ത് പ്രസിഡന്റുമാരായ ജോണ് നീലംപറമ്പില്, ചെറിയാന് മാത്യു, ബ്ലോക്ക് മെമ്പര് ബിജു പഴയപുരയ്ക്കല്, ഗ്രാമപഞ്ചായത്ത് മെമ്പര്മാരായ സൂസന് ഗര്വ്വാസീസ്, കെ.സി. മാത്യു എന്നിവര് പ്രസംഗിച്ചു.
