കോട്ടയം: മീനച്ചിലാറിന്റെ കൈവഴിയായ മീനന്തറയാര് അനധികൃത കൈയ്യേറ്റവും മാലിന്യവും മൂലം ഇല്ലാതാകുന്നു. അയര്ക്കുന്നം, മണര്കാട്, വിജയപുരം പഞ്ചായത്തുകളിലെ നെല്കൃഷിക്കും മറ്റ് ജല സ്രോതസ്സുകള്ക്കും സഹായകമായ ഈ തോട് നാശത്തിന്റെ വക്കിലാണ്.സ്വകാര്യ വ്യക്തികള് കൈയേറി വീട് വയ്ക്കുകയും മതില്ക്കെട്ടി തിരിക്കുകയും ചെയ്തതാണ് നാശത്തിന് കാരണം.
തോട് കൈയേറി നിര്മിച്ച കക്കൂസുകളില് നിന്ന് ഉള്പ്പെടെയുളള മാലിന്യം നദിയിലേക്കാണ് പതിക്കുന്നത്. ഇത് സംബന്ധിച്ച നിരവധി പരാതി പഞ്ചായത്തിനും ആരോഗ്യവകുപ്പ് അധികൃതര്ക്കും കൊടുത്തുവെങ്കിലും നടപടിയുണ്ടായില്ല. കൈയേറ്റത്തിന് പ്രാദേശിക രാഷ്ടീയ നേതൃത്വങ്ങളുടെ പിന്തുണയുമുണ്ട്. മീനന്തറയാറിന്റെ തുടക്കം മുതല് തന്നെ അനധികൃത കൈയേറ്റമുണ്ട്. ഇതുമൂലം നീരൊഴുക്ക് തടസ്സപ്പെട്ടിട്ടുണ്ട്. വേനല്ക്കാലത്ത് രൂക്ഷമായ കുടിവെളള ദൗര്ലഭ്യവും പ്രദേശത്ത് അനുഭവപ്പെടുന്നു. ആറാട്ടുകടവില് തന്നെയുള്ള അനധികൃത നിര്മാണം തോടിന്റെ സ്വഭാവിക ഒഴുക്കിനെ തടസ്സപ്പെടുത്തുകയാണ്.
കൈയേറ്റം നീക്കം ചെയ്ത് മീനന്തറായര് മീനച്ചിലാറുമായി സംയോജിപ്പിച്ചാല് അനേകം കിണറുകളില് ശുദ്ധജലം എത്താനും പഞ്ചായത്തുകളുടെ ജലവിതരണ പദ്ധതികള് തടസ്സം കൂടാതെ നടത്താനും സാധിക്കുമെന്ന് പ്രദേശവാസികള് പറയുന്നു.
