കൊച്ചി: പറവൂര് തെക്കേനാലുവഴി ബിവറേജസിനു സമീപത്തെ ആളൊഴിഞ്ഞ വീട്ടില് മോഷണം നടത്തിയ കോയമ്പത്തൂര് സ്വദേശികളെ പാലാരിവട്ടം പോലീസ് പിടികൂടി. കോയമ്പത്തൂര് വള്ളികോളനിയില് സതീശ് (27), ആനക്കട്ടി കരിമാന്കോവില് കുമാരന് (30) എന്നിവരെയാണ് പാലാരിവട്ടം എസ്ഐ ബേസില് തോമസിന്റെ നേതൃത്വത്തില് അറസ്റ്റു ചെയ്തത്.
പകല് സമയങ്ങളില് ഉന്തുവണ്ടികളില് ആക്രി സാധനങ്ങള് പെറുക്കി നടക്കുന്ന പ്രതികള് ആളില്ലാത്ത വീടുകള് നിരീക്ഷിക്കുകയും രാത്രി മാരാകായുധങ്ങളുമായെത്തി വീടു കുത്തിത്തുറന്ന് കവര്ച്ച നടത്തുകയുമായിരുന്നു പതിവെന്ന് പോലീസ് പറഞ്ഞു.
മൂന്നാഴ്ച മുമ്പാണ് പറവൂര് തെക്കേനാലുവഴിയിലെ വീട്ടില് ഇവര് മോഷണം നടത്തിയത്. സംഭവത്തില് പറവൂര് പോലീസ് കേസെടുത്ത് അന്വേഷണം നടത്തിവരുകയായിരുന്നു.
കൊച്ചി നഗരത്തിലും ആലുവ, പറവൂര് മേഖലകളിലും പ്രതികള് ഇതേ രീതിയില് നിരവധി കവര്ച്ചകള് നടത്തിയതായി സംശയിക്കുന്നുണ്ട്. എഎസ്ഐമാരായ ബോസ്, അനില്കുമാര്, സീനിയര് സിപിഒമാരായ പോള് വര്ഗ്ഗീസ്, ശ്രീകാന്ത് എന്നിവരും അന്വേഷണസംഘത്തിലുണ്ടായിരുന്നു.
