ലണ്ടന്: ബ്രിട്ടീഷ് തലസ്ഥാന നഗരത്തെ ഭീകരര് തുടര്ച്ചയായി ലക്ഷ്യമിടുന്നു. കഴിഞ്ഞ രാത്രി ലണ്ടന് ബ്രിഡ്ജിലും അടുത്തുള്ള ബോറോ മാര്ക്കറ്റിലും നടത്തിയ ആക്രമണത്തില് ഏഴു പേര് കൊല്ലപ്പെട്ടു. അമ്പതോളം പേര്ക്ക് പരിക്ക്. ആക്രമണമഴിച്ചുവിട്ട മൂന്നു ഭീകരരെ സൈന്യം വെടിവെച്ചു കൊന്നു.
ലണ്ടന് ബ്രിഡ്ജില് ആള്ക്കൂട്ടത്തിലേക്ക് വാന് ഓടിച്ചു കയറ്റിയ ശേഷമായിരുന്നു ആക്രമണം. വാനില് നിന്ന് ചാടിയിറങ്ങിയ ഭീകരര്, ജനങ്ങളെയും പോലീസ് ഉദ്യോഗസ്ഥരേയും കുത്തിയും വെട്ടിയും പരിക്കേല്പ്പിക്കുകയായിരുന്നു. പലരുടേയും കഴുത്തറുക്കാനായിരുന്നു ശ്രമം.
മിനിറ്റുകള്ക്കുള്ളില് അക്രമികളെ വെടിവെച്ചു വീഴ്ത്തി. ചാവേറുകളാണെന്നു ബോധിപ്പിക്കാന് അവര് ബോംബുകള് ഘടിപ്പിച്ച വസ്ത്രങ്ങള് ധരിച്ചിരുന്നു. എന്നാല്, ഇത് വ്യാജമെന്നു പിന്നീടു കണ്ടെത്തി.
സെന്ട്രല് ലണ്ടനിലെ ലണ്ടന് ബ്രിഡ്ജില് നിന്ന് ബോറോ മാര്ക്കറ്റിലേക്കുള്ള വഴിയിലൂടെ സഞ്ചരിച്ചിരുന്ന വാനാണ് പെട്ടെന്ന് ആള്ക്കൂട്ടത്തിലേക്ക് ഇടിച്ചു കയറ്റിയത്.
ട്രാഫിക് നിര്ദ്ദേശങ്ങള് അവഗണിച്ചാണ് വാന് പാഞ്ഞത്. മാര്ക്കറ്റിലേക്കു കടക്കുന്നിടത്തുള്ള പടിക്കെട്ടില് ഇടിപ്പിച്ച് വാന് നിര്ത്തിയ ശേഷമാണ് അക്രമികള് വലിയ കത്തികളുമായി ജനങ്ങളെ ആക്രമിച്ചത്.
ഇന്ത്യക്കാരടക്കം നിരവധി വിനോദസഞ്ചാരികള് എത്തുന്ന സ്ഥലമാണിത്. നിലവിളിച്ചു കൊണ്ട് ജനങ്ങള് ചിതറിയോടി. കുത്തേറ്റ് ചിലര് പിടഞ്ഞു വീണു. അവരില് ഏഴു പേര്ക്ക് ജീവന് നഷ്ടപ്പെട്ടു.
പാഞ്ഞെത്തിയ ഭീകര വിരുദ്ധ സേന പ്രദേശത്തിന്റെ നിയന്ത്രണം ഏറ്റെടുത്തു. പരിക്കേറ്റവരെ അടുത്തുള്ള സെന്റ് തോമസ് ആശുപത്രിയിലേക്കു മാറ്റി. ദൃക്സാക്ഷികള് നല്കിയ വിവരങ്ങളുടെ അടിസ്ഥാനത്തില് നടത്തിയ തെരച്ചിലിലാണ് മൂന്നു ഭീകരരേയും കണ്ടെത്തി വെടിവെച്ചു കൊന്നത്.
ആക്രമണവുമായി ബന്ധപ്പെട്ട് കിഴക്കന് ലണ്ടനിലെ ബാര്ക്കിങ്ങില് നിന്ന് 12 പേരെ അറസ്റ്റ് ചെയ്തെന്ന് ബ്രിട്ടീഷ് പോലീസ് അറിയിച്ചു.
