പാലാ: മീനച്ചില് താലൂക്ക് ഓഫീസിലെ ജീവനക്കാരന് അകാരണമായി സ്ഥലം മാറ്റിയെന്നാരോപിച്ച് എന് ജി ഒ യൂണിയന് പ്രവര്ത്തകര് ഇന്നലെ രാവിലെ മീനച്ചില് താലൂക്ക് അഡീഷണല് തഹസില്ദാര് റ്റി.ജെ ജോസഫിനെ ഓഫീസില് ഉപരോധിച്ചു.
എന്ജിഒ യൂണിയന് പ്രവര്ത്തകനായ മീനച്ചില് താലൂക്ക് ഓഫീസിലെ യു.ഡി ക്ലര്ക്ക് റെയ്നോള്ഡ് ജോസിനെയാണ് മീനച്ചില് തഹസില്ദാര് പ്രേമലത തലപ്പുലം വില്ലേജ് ഓഫീസിലേക്ക് സ്ഥലം മാറ്റിയത്. സിപിഐയുടെ യൂണിയനായ ജോയിന്റ് കൗണ്സില് ഇടപെട്ടാണ് റെയ്നോള്ഡിനെ സ്ഥലം മാറ്റിയത് എന്നാണ് എന്ജിഒ യൂണിയന്റെ പരാതി. യൂണിയന് പ്രവര്ത്തകര് പലവട്ടം തഹസില്ദാരോട് സംസാരിച്ചെങ്കിലും സ്ഥലം മാറ്റം റദ്ദ് ചെയ്യാന് അധികാരികള് തയ്യാറാകാത്തതില് പ്രതിഷേധിച്ചാണ് ഇന്നലെ തഹസില്ദാരെ ഉപരോധിച്ചതെന്ന് എന്.ജി.ഒ. യൂണിയന് പാലാ ഏരിയ സെക്രട്ടറി പി. അനില് പറഞ്ഞു. ഇതിനിടെ താലൂക്ക് ഓഫീസില് ബഹളം ഉയര്ന്നതിനെ തുടര്ന്ന് പാലാ സി.ഐ. ടോമി സെബാസ്റ്റ്യന്, എസ്.ഐ അഭിലാഷ് കുമാര് എന്നിവരുടെ നേതൃത്വത്തിലുള്ള പോലീസ് സംഘം സ്ഥലത്തെത്തി. എഡിഎം രാജന് പാലാ ആര്ഡിഒ ഇ.എം.സഫീര് എന്നിവര് ഇടപെട്ടതിനെ തുടര്ന്നാണ് എന്ജിഒ യൂണിയന് പ്രവര്ത്തകര് ഉപരോധ സമരം താല്ക്കാലികമായി പിന്വലിച്ചത്. ഭരണപരമായ നടപടി മാത്രമാണ് സ്ഥലം മാറ്റമെന്നും റെയ്നോള്ഡ് ജോസിനെ അദ്ദേഹത്തിന്റെ വീടിന് അടുത്തുള്ള തലപ്പുലം വില്ലേജിലേക്കാണ് സ്ഥലം മാറ്റിയതെന്നും മീനച്ചില് അഡീഷണല് തഹസില്ദാര് റ്റി.ജെ ജോസഫ് പറഞ്ഞു.
