കൊച്ചി: തിരുവനന്തപുരം മുതല് ചേര്ത്തല വരെയുള്ള പാതയും കുറ്റിപ്പുറം മുതല് കണ്ണൂര് വരെയുള്ള പാതയും ദേശീയപാതയല്ലെന്ന് കേന്ദ്രസര്ക്കാര് വിജ്ഞാപനം ഇറക്കിയിട്ടുള്ള സാഹചര്യത്തില് ഇവിടുത്തെ റോഡരികിലുള്ള ബാറുകള്ക്കും ബിയര് പാര്ലറുകള്ക്കും സുപ്രീം കോടതിയുടെ നിരോധനം ബാധകമല്ലെന്ന് ഹൈക്കോടതി വ്യക്തമാക്കി.സുപ്രീം കോടതി വിധിയെത്തുടര്ന്ന് പൂട്ടിയ ദേശീയ പാതയോരത്തെ ബിയര് ബാറുകള് ഈ വിധിയോടെ തുറന്നു പ്രവര്ത്തിക്കും.
കുറ്റിപ്പുറം-വെങ്ങളം-കണ്ണൂര് പാതയോരത്തെ ബാറുകള്ക്കും നിയമാനുസൃതം അനുമതി നല്കാമെന്ന് സിംഗിള് ബെഞ്ചിന്റെ ഉത്തരവില് പറയുന്നു. 2016 ഡിസംബര് 15 ലെ സുപ്രീംകോടതിയുത്തരവനുസരിച്ച് ദേശീയ പാതയുടെയും സംസ്ഥാന പാതകളുടെയും 500 മീറ്റര് ദൂരത്തില് ബാറുകളും ബിയര് പാര്ലറുകളും പാടില്ല. ദേശീയപാതയോരത്തു നിന്ന് ബാറുകളുടെ പ്രവേശന കവാടം വരെയുള്ള ദൂരമാണ് കണക്കാക്കേണ്ടതെന്നും വിധിയില് പറഞ്ഞിട്ടുണ്ട്.
2010 ഫെബ്രുവരി 26 ന് തിരുവനന്തപുരം-ഓച്ചിറ-ചേര്ത്തല റോഡ് ദേശീയപാതയായി കേന്ദ്ര സര്ക്കാര് വിജ്ഞാപനം ചെയ്തിരുന്നെങ്കിലും 2014 മാര്ച്ച് അഞ്ചിന് ഇതു തിരുത്തി. തിരുവനന്തപുരം-ഓച്ചിറ-ചേര്ത്തല റോഡിനെ (172.8 കിലോമീറ്റര്) ദേശീയപാതയുടെ ഭാഗമല്ലാതാക്കി കേന്ദ്ര സര്ക്കാര് വിജ്ഞാപനമിറക്കി.
ദേശീയ പാതയുടെ പദവി നഷ്ടമായ സാഹചര്യത്തില് ഈ പാതയോരത്തെ ബാറുകള്ക്കും ബിയര് പാര്ലറുകള്ക്കും സുപ്രീം കോടതിയുടെ നിരോധനം ബാധകമല്ല. ഇതേപോലെ 2014 ആഗസ്റ്റ് 14ന് കുറ്റിപ്പുറം-വെങ്ങളം-കണ്ണൂര് പാത (170 കിലോമീറ്റര്) ദേശീയപാതയല്ലെന്ന് കേന്ദ്രസര്ക്കാര് വിജ്ഞാപനമിറക്കിയിരുന്നു. കേന്ദ്രസര്ക്കാരിന്റെ വിജ്ഞാപനം വന്നതോടെ ഈ റോഡുകള് ജില്ലാ റോഡുകളോ നഗര റോഡുകളോ മാത്രമായി. ബിയര് പാര്ലര് ലൈസന്സിനുള്ള അപേക്ഷകളില് എക്സൈസ് ഡെപ്യൂട്ടി കമ്മിഷണര് ഇക്കാര്യം പരിശോധിച്ച് വസ്തുതകള് ബോദ്ധ്യപ്പെട്ടാല് അനുമതി നല്കണമെന്നും ഉത്തരവില് പറയുന്നു.
