കോഴിക്കോട്: കണ്ണൂര് നഗരത്തില് പശുവിനെ പരസ്യമായി വെട്ടിക്കൊന്ന് ഇറച്ചി വിതരണം ചെയ്ത യൂത്ത് കോണ്ഗ്രസ് നേതാക്കളെ ന്യായീകരിച്ച ആറ് കെപിസിസി നേതാക്കള്ക്കെതിരെ നേതൃത്വം നടപടി സ്വീകരിക്കണമെന്ന് ബിജെപി മുന് സംസ്ഥാന പ്രസിഡന്റ് അഡ്വ. പി.എസ്. ശ്രീധരന്പിള്ള ആവശ്യപ്പെട്ടു.
പശുവിനെ വെട്ടിക്കൊന്ന് ഇറച്ചി വിതരണം ചെയ്തതിനെ അപലപിച്ച എഐസിസി നേതൃത്വത്തിന് ആത്മാര്ത്ഥതയുണ്ടെങ്കില് സംഭവത്തെ ന്യായീകരിച്ച നേതാക്കള്ക്കെതിരെ കൂടി നടപടി എടുക്കണമെന്നും അദ്ദേഹം പറഞ്ഞു. എല്ഡിഎഫ് സര്ക്കാര് ഒരു വര്ഷം പൂര്ത്തിയാക്കുന്നതിന്റെ ഭാഗമായി എന്ഡിഎ കോഴിക്കോട് ജില്ലാ കമ്മിറ്റി സംഘടിപ്പിച്ച ദുര്ഭരണത്തിന്റെ ഒരു വര്ഷം പ്രതിഷേധ ധര്ണ്ണ ഉദ്ഘാടനം ചെയ്യുകയായിരുന്നു അദ്ദേഹം.
ഭാരത സൈന്യത്തെ അപമാനിച്ച സിപിഎം സംസ്ഥാന സെക്രട്ടറി കോടിയേരി ബാലകൃഷ്ണനെതിരെ കേസെടുക്കണം. രാജ്യത്തിന്റെ അതിര്ത്തികാക്കുന്ന സൈനികരുടെ ആത്മാഭിമാനത്തെ ചോദ്യം ചെയ്യുന്നതാണ് കോടിയേരിയുടെ പ്രസ്താവന.
കാലിച്ചന്തകളില് അറവുമാടുകളെ വില്ക്കുന്നത് വിലക്കിയ ഉത്തരവിനെക്കുറിച്ച് എല്ഡിഎഫും യുഡിഎഫും കുപ്രചരണമാണ് നടത്തുന്നത്. ജനങ്ങളെ ഭിന്നിപ്പിക്കാനാണ് എല്ഡിഎഫും യുഡിഎഫും പ്രതിഷേധവുമായി രംഗത്ത് വരുന്നത്.
ജഡ്ജിമാര്ക്കെതിരെയാണ് എറണാകുളത്ത് മുസ്ലിം ഏകോപന സമിതി സമരം നടത്തുന്നത്. മുസ്ലിം സഹോദരന്മാര് കബിളിപ്പിക്കപ്പെടുകയാണ്. ഹിന്ദുവാണെന്ന് തെറ്റിദ്ധരിച്ചാണ് പലരും വിധി പറഞ്ഞ ജഡ്ജിക്കെതിരെ പരാമര്ശം നടത്തുന്നതെന്നും ശ്രീധരന്പിള്ള കൂട്ടിച്ചേര്ത്തു. ബിജെപി ജില്ലാ പ്രസിഡന്റ് ടി.പി. ജയചന്ദ്രന് അദ്ധ്യക്ഷത വഹിച്ചു.
