ഉപനിഷദ് സത്യത്തിന്റെ സാക്ഷാത്ക്കാരത്തോടെ അറിവ് പൂര്ണതയിലെത്തി അവിടെ അവസാനിക്കുന്നതുകൊണ്ടാണ് ഉപനിഷത്തുകള്ക്ക് വേദാന്തം എന്ന പേരുണ്ടായത്. വേദാന്തമെന്നാല് വേദത്തിന്റെ അവസാന ഭാഗമെന്നതു പോലെ അറിവിന്റെ അറ്റം, പൂര്ണത എന്നും അര്ഥം പറയാം. ഉപനിഷദ് പ്രതിപാദിതമായ തത്വജ്ഞാനത്തിനപ്പുറം ഇന്ന് ലോകത്ത് ഏതൊരു ചിന്തകനും പോകുവാന് സാധിച്ചിട്ടില്ല എന്നതു തന്നെ വേദാന്തമെന്ന പേരിനെ സാധൂകരിക്കുന്നുണ്ട്.
ദശോപനിഷത്തുക്കളില് തത്വചിന്തയിലും വിഷയവൈവിധ്യത്തിലും അഗ്രിമസ്ഥാനമലങ്കരിക്കുന്നതാണ് ബ്യഹദാരണ്യകോപനിഷത്ത്. ശുക്ള യജുര്വേദത്തിലെ ശതപഥബ്രാഹ്മണത്തില് ഉള്പ്പെട്ട ഉപനിഷത്താണിത്. ഇന്ദ്രിയ പ്രത്യക്ഷമായ ഈ ലോകം അനിത്യവും അസത്യവുമാണെന്ന് സൂചിപ്പിച്ച് ഇതിന് അധിഷ്ഠാനമായ നിത്യവും സത്യവുമായ ആത്മാവിനെ പ്രകാശിപ്പിക്കുന്ന ഉപനിഷത്താണിത്. ആ വിഷയത്തിലുള്ള പല സംശയങ്ങള്ക്കും അന്ധവിശ്വാസങ്ങള്ക്കും തക്കതായ പരിഹാരം ബ്യഹദാരണ്യകം മുന്നോട്ടുവയ്ക്കുന്നു.
ബ്യഹദാരണ്യകത്തിലെ ആറ് അധ്യായങ്ങളെ ആറു കാണ്ഡങ്ങളായി തിരിച്ചിരിക്കുന്നു.
മധുകാണ്ഡം, മുനികാണ്ഡം, ഖിലകാണ്ഡം എന്നിവയാണ് പ്രധാനം. ആറ് അധ്യായങ്ങളെ നാല്പ്പത്തിയേഴ് ബ്രാഹ്മണങ്ങളായി വിഭജിച്ചിട്ടുണ്ട്. എന്നാല്, ബ്യഹദാരണ്യക ത്തിന്റ ജീവനായിട്ടുള്ളത് മൂന്നും നാലും അധ്യായങ്ങളാണ്. മുമ്പു പറഞ്ഞിട്ടുള്ളതിനെ സമര്ഥിക്കുകയാണ് ഇതില് ചെയ്യുന്നത്. യാജ്ഞവല്ക്യനാണ് ഇതിലെ മുഖ്യാചാര്യന്. ബ്രഹ്മ വാദിനി ഗാര്ഗിയും യാജ്ഞവല്ക്യനും തമ്മിലുള്ള സംവാദത്തില് ‘ഇനി സംസാരിച്ചാല് നിന്റെ തല പൊട്ടിത്തെറിക്കും’ എന്ന് യാജ്ഞവല്ക്യന് സ്ത്രീയായതിന്റെ പേരില് ഗാര്ഗിയെ ശപിച്ചു എന്ന ചിലരുടെ ആക്ഷേപത്തെ വിശകലനം ചെയ്യുന്നതിന് മുമ്പ് ആരാണ് യാജ്ഞവല്ക്യന് എന്നു നോക്കാം.
മൂന്ന് യാജ്ഞവല്ക്യന്മാരെക്കുറിച്ച് ഗ്രന്ഥങ്ങളില് സൂചനകളുണ്ട് ഒന്നാമതായി, രാമായണത്തിലെ സീതാദേവിയുടെ പിതാവായ ജനക മഹാരാജാവിന്റെ ആധ്യാത്മികാചാര്യനായ ഒരു യാജ്ഞവല്ക്യന്. രണ്ടാമതായി, ശുക്ള യജുര്വേദത്തിന്റെ ആചാര്യനായ യാജ്ഞവല്ക്യന്. വ്യാസ ഭഗവാന് വേദങ്ങളെ വ്യസിച്ചപ്പോള്, പകുത്തപ്പോള് യജുര്വേദം വൈശമ്പായന മഹര്ഷിക്കാണ് ഉപദേശിച്ചത്. മഹര്ഷി വൈ ശമ്പായനന്റെ ശിഷ്യനാണ് യാജ്ഞവല്ക്യന്. ഈ യാജ്ഞവല്ക്യന് പില്ക്കാലം സൂര്യദേവനെ ഉപാസിച്ച് വരമായി വാങ്ങിയതാണ് ശുക്ള യജുര്വേദം. മൂന്നാമത്തെ ആളെപ്പറ്റി പറയപ്പെടുന്നത് അദ്ദേഹം മഹര്ഷി വിശ്വാമിത്രന്റെ നൂറു പുത്രന്മാരില് ഒരാള് എന്നാണ്. നൂറു പുത്രന്മാര് എന്നു സൂചിപ്പിക്കുന്നത് ശിഷ്യന്മാരെയാകാം.
യാജ്ഞവല്ക്യന് എന്ന നാമധേയം ഒരു ബഹുമതിയാണ്. ഋഷിയുടെ യഥാര്ഥ നാമം വ്യക്തമാകുന്നില്ല. പില്ക്കാലത്ത് ബഹുമാന സൂചകമായി ഈ പേര് സ്ഥിതീകരിക്കപ്പെടുകയാണ് ഉണ്ടായത്. എന്നാല്, ഈ ബഹുമതിയുടെ അര്ഥം എന്താണ്?
വല്ക്കം എന്നാല് വലയം ചെയ്തുനിന്ന് സംരക്ഷണം കൊടുക്കുന്നത് എന്ന് അര്ഥം. മരത്തിന്റെ പട്ട, തൊലി ,ചട്ട, പാമ്പിന്റെ പടം, വസ്ത്രം എന്നെല്ലാം വല്ക്കത്തിന് അര്ഥം പറയാം. യാജ്ഞവല്ക്യന് എന്നാല് യജ്ഞത്തെ സംരക്ഷിച്ചവന് എന്നാണ് ശരിയായ അര്ഥം.
ഋഷിമാര് ചില പ്രത്യേക വ്യക്ഷങ്ങളുടെ പുറംപട്ട എടുത്ത് ചതച്ചു പരത്തി വസ്ത്രമായി ധരിച്ചിരുന്നല്ലോ.
പില്ക്കാലം അവരുപയോഗിച്ച വല്ക്കലം, മരവുരി വസ്ത്രത്തിന്റെ പര്യായപദമായി മാറി. ഇപ്പോഴും, വൈദികതാന്ത്രിക കര്മങ്ങളുടെ ആരംഭത്തില് കൂറപവിത്രം കൊടുക്കുക എന്നൊരു ആചരണമുണ്ട്. അതില് പ്രധാനമായും വസ്ത്രവും പവിത്രവും ദ്രവ്യങ്ങളും കൊടുക്കുന്നു. പ്രധാന ഋത്വിക്കിന് യജമാനന് കൂറപവിത്രം കൊടുത്ത് യജ്ഞാരംഭത്തിന് അനുമതിയരുളുന്നു. യജ്ഞത്തിന് സംരക്ഷണം ചെയ്യുന്നു എന്നതാണ് ഈ ചടങ്ങു കൊണ്ടുദ്ദേശിക്കുന്നത്.
7907682691
