ലണ്ടന്: പരിസ്ഥിതിക്കും മനുഷ്യന്റെ ആരോഗ്യത്തിനും ഹാനി വരുത്തുന്ന ഡീസല് വാഹനങ്ങളുടെ ഉപയോഗം കുറയ്ക്കുക എന്ന ലക്ഷ്യത്തോടെ ലണ്ടന് കടുത്ത നടപടികളിലേക്ക്. ഡീസല് വാഹനങ്ങള്ക്ക് നഗരഹൃദയത്തില് ഇപ്പോള് നല്കുന്ന 11.50 പൗണ്ടിന് പിന്നാലെ 12.50 പൗണ്ട് ഡീസല് നികുതി കൂടി ഏര്പ്പെടുത്തിയിരിക്കുകയാണ് മേയര് സാദിഖ് ഖാന്.
ഇതോടെ ലണ്ടനില് കാര് കയറ്റാന് ഒരു ദിവസം അടയ്ക്കേണ്ടത് 24 പൗണ്ട് ആയി ഉയരുമെന്നുറപ്പാണ്. ഇതോടെ ഡീസല് വാഹനങ്ങള് തലസ്ഥാനത്ത് മൂന്നിരട്ടി നികുതി അടക്കേണ്ടി വരും. പുതിയൊരു ടോക്സിറ്റി ടി- ചാര്ജ് ഏര്പ്പെടുത്താനാണ് താന് ശ്രമിക്കുന്നതെന്നാണ് ഖാന് പറയുന്നത്.
നിലവില് വീക്ക്ഡേകളില് കണ്ജസ്റ്റന് ചാര്ജായ 11.50 പൗണ്ട് രാവിലെ ഏഴ് മുതല് വൈകുന്നേരം ആറ് വരെ ബാധകമാകുന്ന മേഖലകള്ക്ക് മുകളില് തന്നെയായിരിക്കും ഈ വര്ഷം ഒക്ടോബര് മുതല് നടപ്പിലാക്കുന്ന അധിക ചാര്ജായ 12.50 പൗണ്ടും ബാധകമാകുക.
എന്നാല് പുതിയ ചാര്ജേര്പ്പെടുത്തുന്നതിലൂടെ വിഷവാതകം പുറന്തള്ളുന്നത് കുറഞ്ഞ അളവില് മാത്രമേ നിയന്ത്രിക്കാനാവുകയുള്ളുവെന്ന വിമര്ശനം ശക്തമാകുന്നുണ്ട്. ഡീസല് കാറുകള്ക്കുള്ള പുതിയ നികുതികള് ഈ ഓട്ടം സ്റ്റേറ്റ്മെന്റില് പ്രഖ്യാപിക്കുമെന്നാണ് കരുതുന്നത്.
2019ല് ടി-ചാര്ജിന് പകരം നഗരത്തില് ഒരു അള്ട്രാ- ലോ എമിഷന്സ് സോണ് സൃഷ്ടിക്കാനാണ് ഖാന് പദ്ധതിയിടുന്നത്. ഇത് പ്രകാരം പുതിയ എമിഷന്സ് പരിധികള് പാലിക്കാത്ത ഡീസല് കാറുകളെ സെന്ട്രല് ലണ്ടനില് നിരോധിക്കുന്നതാണ്.
നിരവധി ലണ്ടന് ബറോകള് ഡീസല് കാറുകള്ക്കുള്ള പാര്ക്കിങ് ചാര്ജുകള് വര്ധിപ്പിച്ചിട്ടുണ്ട്. 50 ശതമാനം എന്ഒ2വും അന്തരീക്ഷത്തിലേക്ക് വരുന്നത് വാഹനങ്ങളില് നിന്നാണെന്നും തന്റെ പദ്ധതികളിലൂടെ 2020 ആകുമ്പോഴേക്കും ഇതില് 50 ശതമാനം കുറവ് വരുത്താനാകുമെന്നുമാണ് ഖാന് അവകാശപ്പെടുന്നത്.
ലണ്ടനിലെ അന്തരീക്ഷം അനുദിനം വിഷമയമാവുകയാണെന്നും ഇവിടുത്തെ മോശപ്പെട്ട വായു കാരണം പ്രതിവര്ഷം 9000ത്തില് അധികം ജനങ്ങള് അകാലമരണത്തിന് വിധേയമാകുന്നതിനാലുമാണ് ഡീസല് വാഹനങ്ങളെ നിയന്ത്രിക്കാന് കടുത്ത നടപടികളുമായി മുന്നോട്ട് പോകുന്നതെന്നും ഖാന് വിശദീകരിക്കുന്നു.
