ബാലുശ്ശേരി: വിമുക്തഭടനായ എരമംഗലം കരുവങ്ങല് രാജന്നായരെ ആത്മഹത്യയിലേക്ക് നയിച്ച സംഭവത്തെക്കുറിച്ച് സമഗ്ര അന്വേഷണം നടത്തണമെന്നും കുറ്റക്കാരനായ പോലീസ് ഉദ്യോഗസ്ഥനെതിരെ നിയമ നടപടി സ്വീകരിക്കണമെന്നും ബിജെപി ജില്ലാ പ്രസിഡണ്ട് ടി.പി ജയചന്ദ്രന് വാര്ത്താസമ്മേളനത്തില് ആവശ്യപ്പെട്ടു.
സിപിഎമ്മിന്റെ ഇംഗിതത്തിനു വഴങ്ങുന്ന പോലീസ് ഓഫീസര്മാര് പൗരാവകാശങ്ങള് ധ്വംസിക്കുന്ന നടപടികളുമായി മുന്നോട്ട് പോകുകയാണെന്നും പോലീസ് രാജിനെതിരെ ബിജെപി ശക്തമായി പ്രതികരിക്കുമെന്നും അദ്ദേഹം മുന്നറിയിപ്പ് നല്കി. കണ്ണൂര് ശാന്തമാകുമ്പോള് കോഴിക്കോടിന്റെ വടക്കന് പ്രദേശങ്ങളെ അശാന്തിയിലാക്കാനാണ് സിപിഎം ശ്രമിക്കുന്നത്. കീഴരിയൂരിലും പാലേരിയിലും ഉള്പ്പെടെ നിരവധിസ്ഥലങ്ങളിലാണ് ബിജെപി ആര്എസ്എസ് പ്രവര്ത്തകരെ സിപിഎമ്മുകാര് അക്രമിച്ചത്. എന്നാല് സിപിഎമ്മകാരായ പ്രതികളെ അറസ്റ്റ് ചെയ്യാന് തയ്യാറാകുന്നില്ല.
പൂനത്ത് കഴിഞ്ഞ ദിവസം എസ് ഐ അക്രമിച്ച സംഭവത്തിലും സന്ധ്യ സിനിമാഹാളില് യുവമോര്ച്ച പ്രവര്ത്തകരെ വധിക്കാന് ശ്രമിച്ച സംഭവത്തിലും ഉള്പ്പെട്ട സിപിഎമ്മുകാര് നാട്ടില് വിലസുകയാണ്.പോലീസ് നടപടിക്കെതിരെ ബിജെപി ശക്തമായ ബഹുജന പ്രക്ഷോഭം സംഘടിപ്പിക്കുമെന്നും അദ്ദേഹം പറഞ്ഞു.
കോണ്ഗ്രസ് സിപിഎം പാര്ട്ടികളില് നിന്ന് സംസ്ഥാന നേതാക്കളടക്കം നിരവധിപ്രവര്ത്തകര് ഉടന് ബിജെപിയില് ചേര്ന്ന് പ്രവര്ത്തിക്കുമെന്നും അദ്ദേഹം പറഞ്ഞു. വാര്ത്താസമ്മേളനത്തില് ജില്ലാ സെക്രട്ടറി അഡ്വ. കെ.വി സുധീര്, ബാലുശ്ശേരി നിയോജകമണ്ഡലം പ്രസിഡണ്ട് രാജേഷ്കായണ്ണ, ജനറല് സെക്രട്ടറി ടി സദാനന്ദന് എന്നിവര് പങ്കെടുത്തു.
