തിരുവനന്തപുരം: ഇ.എം. ശങ്കരന് നമ്പൂതിരിപ്പാടും ഇ.കെ. നായനാരും വി.എസ്. അച്യുതാനന്ദനും മാര്ക്സിസ്റ്റുകാരാണ്. ഇവരൊക്കെ മുഖ്യമന്ത്രിയായിരുന്നിട്ടുണ്ട്. അവരൊന്നും വകുപ്പിന് ഉപദേശികളെ തേടിപ്പോയിട്ടില്ല. പക്ഷേ മാര്ക്സിസ്റ്റുകാരന് തന്നെയായ പിണറായി വിജയന് മുഖ്യമന്ത്രിയായപ്പോള് ഉപദേശികളെ തട്ടാതെ സെക്രട്ടേറിയറ്റിനകത്ത് നടക്കാന് വയ്യെന്നായി. ഏറ്റവും ഒടുവിലത്തെ നിയമനം രമണ് ശ്രീവാസ്തവയുടേതാണ്.
പോലീസ് വകുപ്പിനെ ഉപദേശിക്കണമെന്നാണ് ശ്രീവാസ്തവയോട് മന്ത്രിസഭ നിര്ദ്ദേശിച്ചത്. അദ്ദേഹം എവിടെ ഇരുന്നാണ് ഉപദേശിക്കുക എന്നൊരു ചോദ്യമാണ് ഇപ്പോള് ഉയരുന്നത്. കേരളത്തിലിരുന്ന് ഉപദേശി വേണമെങ്കില് ഒന്നാന്തരം മുന് ഡിജിപിയുണ്ട്, ജേക്കബ് പുന്നൂസ്. പാര്ട്ടിയുടെ തത്വവും സമീപനവും നന്നായി അറിയും. കേരളത്തിന്റെ ഭൂമിശാസ്ത്രവും ഉദേ്യാഗസ്ഥരുടെ ഗുണവും നിറവും നന്നായി അറിയും അദ്ദേഹത്തിന്. നിയമനം ലഭിച്ച ഉപദേശി ദല്ഹി ആസ്ഥാനമാക്കുമെന്നാണറിയുന്നത്.
സിബിഐയിലടക്കം ഉന്നത സ്ഥാനത്തുള്ള നിരവധി പേരുമായി നല്ല അടുപ്പക്കാരനാണ് ശ്രീവാസ്തവ. കുടുംബക്കാരും സമുദായക്കാരും മാത്രമല്ല ഒട്ടേറെപ്പേരെ നേരിട്ടറിയും. മുഖ്യമന്ത്രിക്കുവേണ്ടി ദല്ഹിയിലെ സാബ്മാരെ സ്വാധീനിക്കലാവുമോ ശ്രീവാസ്തവയുടെ പണി? സിബിഐയിലുണ്ടായിരുന്ന ലോക്നാഥ് ബഹ്റ ഡിജിപി എന്ന നിലയിലും ഉപദേശി സ്ഥാനത്തിരുന്ന് ശ്രീവാസ്തവയും തള്ളിയാല് ചില കാര്യങ്ങള് നടക്കുമെന്ന ധാരണ മന്ത്രിസഭക്കുണ്ടെങ്കില് അതങ്ങ് നടക്കട്ടെ.
ശ്രീവാസ്തവ ചിലര്ക്കെങ്കിലും നേരത്തെ ഒരു പരിഹാസ കഥാപാത്രമായിട്ടുണ്ട്. വിവാദമുണ്ടാക്കുന്നതിലും ശ്രീവാസ്തവയോളം മിടുക്ക് മറ്റൊരു ഡിജിപിയും കാട്ടിയിട്ടില്ല. മന്ത്രിയായും മുഖ്യമന്ത്രിയായും കരുണാകരന് വാണപ്പോള് ശ്രീവാസ്തവയുടെ പണി പേരക്കുട്ടികളെ കളിപ്പിക്കലും പട്ടിയെ കുളിപ്പക്കലുമാണെന്ന് സഖാക്കള് പൊതുപ്രസംഗങ്ങളില് വച്ചു കാച്ചിയിട്ടുണ്ട്. 1991 ഡിസംബര് 15ന് പാലക്കാട്ട് സംഘര്ഷമുണ്ടായപ്പോള് എനിക്കൊരു മുസ്ലീം മൃതദേഹം വേണമെന്ന് വിളിച്ചുപറഞ്ഞത് നിയമസഭയിലടക്കം കോളിളക്കമുണ്ടാക്കി.
ചാരക്കേസിലെ മാലി സുന്ദരികളുമായി കെട്ടിപിണഞ്ഞ കഥകള് വേറെയും.
ചാരക്കേസ് പിന്നീട് സുപ്രീംകോടതി ചാരമാക്കിയെങ്കിലും അന്ന് കരുണാകരനോടൊപ്പം ശ്രീവാസ്തവയ്ക്കും പണി കിട്ടിയതാണ്. സര്വീസില് തിരിച്ചുകയറി കേന്ദ്രസര്വീസിലേക്ക് പോയ ശ്രീവാസ്തവ ഡിജിപിയായാണ് 2005ല് കേരളത്തില് തിരിച്ചെത്തുന്നത്. മൂന്നുവര്ഷം ഡിജപി സ്ഥാനത്തിരുന്നു. വിഎസ് മുഖ്യമന്ത്രിയായിരുന്നപ്പോള് ശ്രീവാസ്തവയായിരുന്നു ഡിജിപി. യജമാന ഭക്തി പെരുത്ത ശ്രീവാസ്തവ ഏത് സമയത്തുനോക്കിയാലും മുഖ്യമന്ത്രിക്കരികെ. ”ഇയാളെന്തിനാ എപ്പോഴും എന്റെ പുറകെ നടക്കുന്നേ” എന്ന് വിഎസ് ചോദിച്ചതായി പിന്നാമ്പുറ കഥകളുണ്ട്. ‘ശത്രുവിന്റെ ശത്രു മിത്രം’ എന്നൊരു ന്യായമുണ്ടല്ലൊ.
അത് വച്ചുനോക്കിയാല് പിണറായിക്ക് ചേര്ന്ന ഒന്നാന്തരം ഉപദേശിയാകും ശ്രീവാസ്തവ. പോലീസ് ഭരണം നോക്കാന് ജയരാജനെ പ്രൈവറ്റ് സെക്രട്ടറി സ്ഥാനത്തിരുത്തിയിട്ടുണ്ട്. നന്നായാല് തറവാട്ട് സുകൃതം, ചീത്തയായാല് തന്തയുടെ ദോഷം, കുറ്റം ചാര്ത്താന് ഒരാള് വേണമല്ലൊ.
