കുറ്റിയാടി: വിദേശമദ്യഷാപ്പ് തൊട്ടില്‍പാലം സിനിമാ തിയറ്ററിനടുത്തുള്ള സ്വകാര്യ വ്യക്തിയുടെ കെട്ടിടത്തിലേക്ക് മാറ്റി സ്ഥാപിക്കുന്നതിനെതിരെ സമരം നടത്തുന്ന കര്‍മ്മസമിതി സമരപന്തല്‍ സിപിഎം നേതാവിന്റെ നേതൃത്വത്തില്‍ പൊളിച്ചുമാറ്റി. സിപിഎം ഏരിയാസെക്രട്ടറി കെ. കൃഷ്ണന്റെ നേതൃത്വത്തില്‍ നൂറോളം ഡിവൈഎഫ്‌ഐ പ്രവര്‍ത്തകര്‍ പ്രകടനമായെത്തിയാണ് സമരപന്തല്‍ അടിച്ചുതകര്‍ത്തത്. കഴിഞ്ഞ ദിവസം രാത്രിയായിരുന്നു സിപിഎം അതിക്രമം നടന്നത്.
കോടതി ഉത്തരവിനെ തുടര്‍ന്ന് കുറ്റിയാടി കടേക്കച്ചാലില്‍ പ്രവര്‍ത്തിച്ചിരുന്ന മദ്യഷോപ്പ് മാറ്റി സ്ഥാപിക്കുന്നതുമായി ബന്ധപ്പെട്ട് മരുതോങ്കര, കാവിലുംപാറ പഞ്ചായത്തിന്റെ വിവിധ ഭാഗങ്ങളില്‍ കര്‍മ്മസമിതിയുടെ നേതൃത്വത്തില്‍ പ്രതിഷേധ സമരം നടന്നുവരികയാണ്. തൊട്ടില്‍പ്പാലം പോലീസ് സ്റ്റേഷനടുത്തുള്ള കെട്ടിടത്തിലേക്ക് മദ്യഷോപ്പ് ആരംഭിക്കുന്നതിനുള്ള നീക്കത്തിനെതിരെ സമരം നടന്നുവരികയായിരുന്നു. ജഇതിനിടയിലാണ് സിനിമാതിയേറ്ററിനടുത്ത കെട്ടിടത്തിലേക്ക് മാറ്റാന്‍ ശ്രമം നടന്നത്. ഇതിനെതിരെ കര്‍മ്മസമിതി നടത്തുന്ന സമരത്തിന്റെ പന്തലിലാണ് സിപിഎം പൊളിച്ചുമാറ്റിയത്.
കഴിഞ്ഞദിവസം സ്വകാര്യവ്യക്തിയുടെ ഉടമസ്ഥതയിലുള്ള ഇരുനില കെട്ടിടത്തിന് പഞ്ചായത്ത് ഭരണസമിതി നിയമലംഘനത്തിലൂടെ ലൈസന്‍സ് നല്‍കിയത് ഏറെ വിവാദമായിരുന്നു. കര്‍മ്മസമിതിയില്‍ തുടക്കം മുതല്‍ സിപിഎം പ്രതിനിധികള്‍ ഉണ്ടായിരുന്നു. എന്നാല്‍ പല സന്ദര്‍ഭങ്ങളിലും കര്‍മ്മസമിതിയുടെ പ്രവര്‍ത്തനത്തിന് വിരുദ്ധനിലപാടായിരുന്നു സിപിഎം എടുത്തത്.
കഴിഞ്ഞദിവസം പുതിയ കെട്ടിടത്തിലേക്കാവശ്യമായ ഉപകരണങ്ങളും മറ്റും ഇറക്കുന്നത് തടയാന്‍ ശ്രമിച്ച കര്‍മ്മസമിതി പ്രവര്‍ത്തകരെ സിപിഎം നേതാവ് കെ. കൃഷ്ണനും സിപിഎം പ്രവര്‍ത്തകരും തടയുകയും കയ്യേറ്റം ചെയ്യുകയും ചെയ്തു. കുറ്റിയാടി സിഐ സജീവനെ നേതാക്കളടക്കുമുള്ളവര്‍ തെറിയഭിഷേകം ചെയ്തു. എക്‌സൈസ് വകുപ്പ്മന്ത്രിയുടെ അടുത്ത ആളായി അറിയപ്പെടുന്ന ഏരിയാസെക്രട്ടറി കെ. കൃഷ്ണന്‍ മന്ത്രിയുടെ തീരുമാനങ്ങള്‍ നടപ്പാക്കാന്‍ കര്‍മ്മസമതിയെ ഒറ്റുകൊടുത്തിരിക്കുകയാണെന്ന് ബിജെപി ആരോപിച്ചു. മെയിന്‍ റോഡിനോടും നിസ്‌കാരപള്ളിക്കും ക്ഷേത്രത്തിനും അടുത്തായി മദ്യഷാപ്പ് അനുവദിക്കാന്‍ പാടില്ലെന്ന നിയമം ലംഘിച്ച് അനുമതി കൊടുത്തതും നിയമപരമായി നേരിടുമെന്ന് ബിജെപി നാദാപുരം മണ്ഡലം പ്രസിഡന്റ് കെ. രതീഷ് പറഞ്ഞു.
