കണ്ണൂര്: സംസ്ഥാന സാംസ്കാരിക പ്രവര്ത്തക ക്ഷേമനിധി ബോര്ഡിന്റെ പ്രവര്ത്തനങ്ങള് വിശദീകരിക്കുന്നതിനും ക്ഷേമനിധി ബോര്ഡില് പുതുതായി അംഗത്വം നല്കുന്നതിനുമായി കണ്ണൂര് ജില്ലാ ജില്ലാതല സാംസ്കാരിക സംഗമം 18 ന് രാവിലെ 10 മണിക്ക് ചിറക്കല് ഫോക്ലോര് അക്കാദമി ഓഡിറ്റോറിയത്തില് നടക്കും. കെ എം ഷാജി എം എല് എ യുടെ അധ്യക്ഷതയില് സംഗമം പി കെ ശ്രീമതി ടീച്ചര് എം പി ഉദ്ഘാടനം ചെയ്യും. കേരള ഫോക്ലോര് അക്കാദമി ചെയര്മാന് സി ജെ കുട്ടപ്പന് മുഖ്യാതിഥിയാകും. ക്ഷേമനിധി ബോര്ഡ് ചെയര്മാന് പി ശ്രീകുമാര്, സെക്രട്ടറി ദീപ ഡി നായര്, കേരള ഫോക്ലോര് അക്കാദമി വൈസ് ചെയര്മാന് എരഞ്ഞോളി മൂസ, ക്ഷേമനിധി ബോര്ഡ് ഡറരക്ടര് കൊടക്കാട്ട് രവീന്ദ്രന്, എസ് ആര് ഡി പ്രസാദ്, കൃഷ്ണമണിമാരാര്, നയന്താര മഹാദേവന് തുടങ്ങിയവര് പങ്കെടുക്കും.
സംസ്ഥാന സാംസ്കാരിക പ്രവര്ത്തക ക്ഷേമനിധി ബോര്ഡിന്റെ പ്രവര്ത്തനമേഖല വിപുലീകരിക്കുന്നതിനും കേരളത്തിലെ മുഴുവന് കലാസാംസ്കാരിക പ്രവര്ത്തകരിലേക്കും ക്ഷേമപ്രവര്ത്തനങ്ങള് എത്തിക്കുന്നതിനും വേണ്ടി ജില്ലകള് തോറും സാംസ്കാരിക സംഗമങ്ങള് നടക്കുന്നതിന്റെ ഭാഗമായാണിത്. നാടകം, സംഗീതം, നൃത്തം, ക്ലാസിക്കല് കലകള്, നാടന് കലകള്, സിനിമ, ഇലക്ട്രോണിക് മാധ്യമങ്ങള്, കേബിള് ശൃംഖല, മാപ്പിളപ്പാട്ട്, അനുകരണ കല, സാഹിത്യം, ചിത്രരചന, ശില്പകല, മേക്കപ്പ്, വാദ്യകലകള്, മാജിക്, സര്ക്കസ്, കഥാപ്രസംഗം, സ്റ്റേജ്-പന്തല് അലങ്കാരം, ഫോട്ടോഗ്രഫി തുടങ്ങി വിവിധ മേഖലകളില് പ്രവര്ത്തിക്കുന്നവര്ക്കുപുറമെ സ്റ്റേറ്റ് ലൈബ്രറി കൗണ്സിലില് അഫിലിയേറ്റ് ചെയ്ത ഗ്രന്ഥാലയങ്ങളുടെ ലൈബ്രേറിയന്മാരും, കലാസാംസ്കാരിക രംഗത്ത് പ്രവര്ത്തിക്കുന്നവരും സാംസ്കാരിക പ്രഭാഷണങ്ങള് നടത്തുന്നവരും ക്ഷേമനിധി ബോര്ഡിന്റെ പ്രവര്ത്തന പരിധിയില് വരുമെന്ന് സെക്രട്ടറി എം കെ നമ്പ്യാര് അറിയിച്ചു.
