അപകട ഭീഷണി നേരിടുന്ന തക്യാവ് പാലം
പൂച്ചാക്കല്: കാലപ്പഴക്കം, പാണാവള്ളി തക്യാവ് പാലം അപകടാവസ്ഥയില്. പഞ്ചായത്തിലെ നാല് പതിനേഴ് വാര്ഡുകളെ തമ്മില് ബന്ധിപ്പിക്കുന്ന പാലമാണ് അപകട ഭീഷണി നേരിടുന്നത്.
1970 ല് പഞ്ചായത്താണ് പാലം നിര്മിച്ചത്. പിന്നീട് അറ്റകുറ്റപണികള് നടത്താത്തതാണ് പാലം ജീര്ണവസ്ഥയിലാകുന്നതിന് കാരണം. ഇരുവശങ്ങളിലുമുള്ള ചവിട്ടുപടികള് ഇളകി ഏത് നിമിഷവും പാലം നിലം പതിക്കാവുന്ന അവസ്ഥയിലാണ്.
സമീപവാസികളടക്കം നൂറുകണക്കിന് ആള്ക്കാരാണ് ഇതുവഴി പോകുന്നത്. അരയങ്കാവ് ക്ഷേത്രത്തിലേക്കും, ചേര്ത്തല, അരൂക്കുറ്റി റോഡിലേക്കും ആന്നലത്തോട് പ്രദേശങ്ങളിലുള്ളവര്ക്ക് എളുപ്പത്തില് എത്തിച്ചേരാവുന്ന പ്രധാന മര്ഗമാണിത്.
പാലം തകര്ച്ചയിലായതോടെ യാത്രക്കാര് ഭീതിയോടെയാണ് സഞ്ചരിക്കുന്നത്. തെരുവ് വിളക്കുകള് പ്രകാശിക്കാത്തതിനാല് രാത്രി കാലങ്ങളില് കാല് നടയാത്ര അപകടകരമായി.
പ്രദേശവാസികള് നിരവധി തവണ ജനപ്രതിനിധികള്ക്കും പഞ്ചായത്ത് അധികൃതര്ക്കും പരാതികള് നല്കിയിട്ടും യാതൊരു നടപടിയും സ്വീകരിച്ചിട്ടില്ല. അടിയന്തരമായി പാലം പുനര്നിര്മിക്കണമെന്ന് നാട്ടുകാര് ആവശ്യപ്പെട്ടു.
