പട്ടണക്കാട് താന്നിക്കല് ടി.എസ്.ജോജോയുടെ വീട്ടില് കയറിയ കടല്വെള്ളം അഗ്നിശമന സേന ഉദ്യോഗസ്ഥര് പമ്പ് ചെയ്ത് കളയുന്നു
തുറവൂര്: തിരമാലകള് അടിച്ചുകയറി തീരത്തെ വീടുകളില് വെള്ളം കയറി. കുത്തിയതോട്, പട്ടണക്കാട്, കടക്കരപ്പള്ളി മേഖലയിലെ വീടുകളിലാണ് ഇന്നലെ വെള്ളം കയറിയത്. ഇന്ന് മരണ അടിയന്തിരം ചടങ്ങുകള് നടക്കുന്ന പട്ടണക്കാട് താന്നിക്കല് ടി.എസ്. ജോജോയുടെ വീട്ടിലെ പുരയിടത്തില് നിന്നു അഗ്നിശമന സേനയാണ് വെള്ളം പമ്പ് ചെയ്ത് കളഞ്ഞത്.
ഇവിടെ കെട്ടിയിരുന്ന പന്തലിലും വീടിനു ചുറ്റും വെള്ളം നിറഞ്ഞതോടെയാണ് റവന്യു അധികാരികള് ഇടപെട്ട് അഗ്നിശമന സേനയുടെ സഹായം തേടിയത്. മേഖലയില് അരകിലോമീറ്ററോളം ഭാഗത്തു കടല്ഭിത്തി ഇല്ല. കടല്ഭിത്തിയുള്ള ഭാഗങ്ങളില് കല്ലുകള്ക്കിടയിലൂടെയാണ് തിരയടിച്ച് വെള്ളം കരയിലേക്ക് കയറുന്നത്.
ഇത്തരത്തില് കയറുന്ന വെള്ളം തിരികെ കടലിലേക്ക് ഒഴുകിപോകാതെ കെട്ടിനില്ക്കുന്നതാണ് പ്രശ്നമാകുന്നത്. തീരത്തെ കാനകള് അടഞ്ഞുകിടക്കുന്നതാണ് പ്രധാന കാരണമെന്ന് ഇവിടം സന്ദര്ശിച്ച തഹസില്ദാര് മുഹമ്മദ് ഷെറീഫ് പറഞ്ഞു.
