തിരുവനന്തപുരം: കൊട്ടിയൂര് പീഡനക്കേസില് അന്വേഷണം നേരിടുന്ന ടി.ബി. സുരേഷിനെ സംസ്ഥാന ബാലാവകാശ കമ്മീഷന് അംഗമായി നിയമിച്ച നടപടി പുനഃപരിശോധിക്കണമെന്ന് ജവഹര് ബാലജനവേദി സംസ്ഥാന ചെയര്മാന് ജി.വി. ഹരി. ഇരയായ, പ്രായപൂര്ത്തിയാകാത്ത പെണ്കുട്ടി പ്രസവിച്ച കുഞ്ഞിനെ അനാഥാലയത്തില് പ്രവേശിപ്പിച്ച നടപടിയില് അന്ന് വയനാട് ചൈല്ഡ് വെല്ഫെയര് കമ്മിറ്റി അംഗമായിരുന്ന സുരേഷ് അലംഭാവം കാട്ടിയതായി പ്രാഥമിക അന്വേഷണ റിപ്പോര്ട്ടില് ചൂണ്ടിക്കാട്ടിയിരുന്നു.
അന്വേഷണം പൂര്ത്തിയാകുന്നതുവരെ സര്വീസില് നിന്നു മാറ്റിനിര്ത്തണമെന്നും നിര്ദേശമുണ്ടായിരുന്നു. ഇത്തരത്തില് നടപടി നേരിടുന്ന വ്യക്തിയെ വീണ്ടും ഉത്തരവാദപ്പെട്ട സ്ഥാനത്തേക്ക് നിര്ദ്ദേശിച്ചതിനുപിന്നില് രാഷ്ട്രീയ ഇടപെടലുകളാണ്. സിപിഎം ജില്ലാ കമ്മിറ്റി അംഗമായതിനാലാണ് ഇത്തരമൊരു പദവിയിലേക്ക് ഇദ്ദേഹത്തിന്റെ പേര് നിര്ദേശിച്ചത്.
മാര്ച്ച് ആറിനാണ് സാമൂഹ്യനീതിവകുപ്പ് സുരേഷിന്റെ ഭാഗത്തുള്ള അലംഭാവം ചൂണ്ടിക്കാട്ടി നടപടിക്ക് നിര്ദ്ദേശിച്ചത്. കഴിഞ്ഞ മാസം 29നാണ് ബാലാവകാശ സംരക്ഷണ സമിതി അംഗമായി നിയമിച്ചതായി ഉത്തരവ് വന്നത്. ഇത് പുനഃപരിശോധിക്കുന്നതിന് അടിയന്തര നടപടിവേണമെന്നും ഹരി ആവശ്യപ്പെട്ടു.
