കോഴിക്കോട്: മാത്യു ബ്രൗണിന്റെ ശ്രീനിവാസ രാമാനുജനെക്കുറിച്ചുള്ള സിനിമ നാളെ കോഴിക്കോട്ട് പ്രദര്ശിപ്പിക്കുന്നു. വിഖ്യാത ഗണിത ശാസ്ത്രജ്ഞന് ശ്രീനിവാസ രാമാനുജന്റെ ജീവിത ചിത്രം അനാവരണം ചെയ്യുന്ന ”ദ മെന് ഹു ന്യൂ ഇന്ഫിനിറ്റി” എന്ന ചിത്രമാണ് മേഖലാ ശാസ്ത്ര കേന്ദ്രത്തില് രാവിലെ പത്തു മണിക്ക് പ്രദര്ശിപ്പിക്കുന്നത്.
കോഴിക്കോട് ഫിലിം സൊസൈറ്റിയുടെ ഉദ്ഘാടന ചടങ്ങിലാണ് പ്രദര്ശനം. കുംഭകോണത്തു നിന്നു ആരംഭിച്ച് കേംബ്രിഡ്ജ് സര്വകലാശാലയിലെ റോയല് സൊസൈറ്റി ഫെലോ വരെ എത്തിയ രാമാനുജന്റെ സുദീര്ഘമായ ജീവിതം ചിത്രത്തില് കാണാം. ഇംഗ്ലീഷിലും സംസ്കൃതത്തിലും പരാജയമേറ്റ രാമാനുജം ഗണിതശാസ്ത്രത്തിലാണ് മുന്നേറിയത്.
കടല് കടന്ന് കേംബ്രിഡ്ജിലേക്ക് യാത്രയാകുന്ന രാമാനുജന് കുടുംബത്തിന് വേദനയാണ് നല്കുന്നത്. യാഥാസ്ഥിക ചിന്തകളെ മറികടന്നുകൊണ്ട് ഗണിതശാസ്ത്രത്തിന്റെ ഉയരങ്ങള് തേടാനുള്ള യാത്രയില് കഠിനമായ രോഗബാധയാണ് രാമാനുജനെ തേടിയെത്തുന്നത്. വംശീയ വിദ്വേഷത്തിന്റെ പീഡനങ്ങളും മറികടന്ന് റോയല് സൊസൈറ്റിയുടെ ഫെല്ലോഷിപ്പ് നേടുന്നതിന് പിന്നിലെ തപസ്യയാണ് ചിത്രം പറയുന്നത്. 1915 ഏപ്രില് 26 ന് ജീവിതത്തോട് വിടപറഞ്ഞ് രാമാനുജന് ഗണിത ശാസ്ത്ര രംഗത്തെ അത്ഭുതമായാണ് അറിയപ്പെടുന്നത്.
ഗോവയിലെ അന്താരാഷ്ട്ര ഫിലിം ഫെസ്റ്റിവലടക്കം പ്രശസ്തമായ വേദികളില് അവതരിപ്പിച്ച സിനിമയില് ദേവ് പട്ടേലാണ് രാമാനുജന്റെ വേഷമിടുന്നത്.
ശാന്തിസ്വരൂപ് ഭട്നഗര് അവാര്ഡ് നേടിയ ഗണിത ശാസ്ത്രജ്ഞന് ഡോ. സന്ദീപ് കുന്നത്ത് മുഖ്യാതിഥിയായിരിക്കും. സംവിധായകന് രഞ്ജന് പ്രമോദ് ഉദ്ഘാടനം ചെയ്യും.
പ്രതികരിക്കാൻ ഇവിടെ എഴുതുക: