തിരുവനന്തപുരം: ഗാന്ധിയന് പി.വി.രാജഗോപാല് പ്രകൃതിചൂഷണത്തിനെതിരെയും നീതിക്കും ശാന്തിക്കും വേണ്ടിയും ജയ് ജഗത്-2020 എന്ന പേരില് ബോധവത്കരണ സന്ദേശയാത്ര നടത്തുന്നു. കേസരി സ്മാരക ട്രസ്റ്റിന്റെ ആഭിമുഖ്യത്തില് നടന്ന മുഖാമുഖത്തിലാണ് ഇക്കാര്യം അറിയിച്ചത്.
പീസ് മിനിസ്ട്രി എന്ന വകുപ്പ് കേന്ദ്രത്തില് രൂപീകരിക്കണമെന്ന് പ്രധാനമന്ത്രിയോട്്് ആവശ്യപ്പെട്ടതായി അദ്ദേഹം പറഞ്ഞു. ഇതിലൂടെ നമ്മുടെ രാജ്യത്ത് പുതിയ സംസ്കാരം വളര്ത്തിയെടുക്കാം. ഇക്കാര്യം പരിഗണിക്കാമെന്ന് പ്രധാനമന്ത്രി ഉറപ്പു നല്കി.
2019 ഒക്ടോബര് 2 ന് ഡല്ഹിയില്നിന്ന് ആരംഭിച്ച് പാകിസ്ഥാന്, അഫ്ഗാനിസ്ഥാന്, ചൈന തുടങ്ങി വിവിധ രാജ്യങ്ങളിലൂടെ ലോക സമാധാന ദിനമായ 2020 സെപ്തംബര് 21 ന് ജനീവയില് എത്തിച്ചേരുന്നു. ഈ യാത്രയില് വിവിധ രാജങ്ങളിലുള്ളവര് പങ്കുചേരും. ഭാരതീയരുടെ ‘വസുധൈവ കുടുംബകം’ എന്ന സന്ദേശത്തിന്റെ ചുവടുപിടിച്ചാണ് ജയ് ജഗത് -2020 സന്ദേശയാത്രയെന്ന് ആദ്ദേഹം പറഞ്ഞു.
വടക്കേ ഇന്ത്യയിലാണ് പ്രകൃതി ചൂഷണം ഏറ്റവും കൂടുതല് നടക്കുന്നത്. വനവാസികള് നടത്തുന്ന ഭൂസമരത്തിന് സാധാരണക്കാര് മുന്നിട്ടിറങ്ങണം. അല്ലാതെ അവരെ തലസ്ഥാനത്തെത്തിച്ച് സമരം ചെയ്യിക്കുകയല്ല വേണ്ടതെന്ന് അദ്ദേഹം പറഞ്ഞു. ‘ഭൂമി അവകാശവും സംരക്ഷണവും’ എന്ന വിഷയത്തില് അദ്ദേഹം പ്രഭാഷണം നടത്തി. കേസരി ട്രസ്റ്റ് ഭാരവാഹികളായ സി. റഹിം, രവീന്ദ്രന് എന്നിവര് സംസാരിച്ചു.
