പാരിസ്: ഇമ്മാനുവല് ജീന് മിഷെല് ഫ്രെഡെറിക് മക്രോണ് എന്ന പതിനഞ്ചു വയസുകാരന് തന്റെ സ്കൂളിലെ സാഹിത്യ അധ്യാപിക മുപ്പത്തൊമ്പതുകാരിയായ ബ്രിജിറ്റ് മാരി ക്ലൗഡൈയോടു തോന്നിയ അടുപ്പത്തെ എന്തു വിളിക്കണം എന്ന് അന്ന് അറിയില്ലായിരുന്നു. പിന്നീട് പ്രായത്തെ അതിജീവിച്ച് ആ ബന്ധം പ്രണയമായി വളര്ന്നു.
മക്രോണിന്റെ വീട്ടുകാര് പലതരത്തില് ശ്രമിച്ചെങ്കിലും തന്നെക്കാള് ഇരുപത്തിനാലു വയസിനു മൂപ്പുള്ള സ്ത്രീയെ മറക്കാന് അവന് ഒരുക്കമായിരുന്നില്ല. അവര് ഒന്നിച്ചു ജീവിക്കാന് തീരുമാനിച്ചു. 2007ല് അവര് വിവാഹിതരായി. ബ്രിജിറ്റിന്റെ ആദ്യ ബന്ധത്തിലെ മൂന്നു മക്കളെ മക്രോണ് ദത്തെടുത്തു. ഒരിക്കല് ബ്രിജിറ്റ് പറഞ്ഞു, എന്റെ മറ്റു വിദ്യാര്ഥികളെപ്പോലെയായിരുന്നില്ല മക്രോണ്.
സോഷ്യലിസ്റ്റ് പാര്ട്ടി അംഗമായിരിക്കെയാണ് മക്രോണ് ഫ്രാന്സിന്റെ സാമ്പത്തിക, വ്യവസായ കാര്യ മന്ത്രിയായത്. അതോടെ ജോലി രാജിവെച്ച് ബ്രിജിറ്റ് ഭര്ത്താവിന്റെ നിഴലായി മാറി. പ്രസിഡന്റ് പ്രചരണ ഘട്ടത്തിലുടനീളം കരുത്തായി ഒപ്പം നിന്നു.
ബ്രിജിറ്റ് മാരി ക്ലൗഡൈ ഇപ്പോള് ഫ്രാന്സിന്റെ ഫസ്റ്റ് ലേഡിയാണ്. തെരഞ്ഞെടുപ്പു പ്രചരണ ഘട്ടത്തിലുടനീളം മക്രോണ് പറഞ്ഞു, സ്കൂളില് പഠിക്കുമ്പോള് ഈ സ്ത്രീ എന്ന നാടകത്തില് സംവിധാനം ചെയ്തു. ഇപ്പോള് പ്രസിഡന്റാവാന് ഈ സ്ത്രീ എന്നെ സംവിധാനം ചെയ്തൊരുക്കുന്നു. ഇന്നലെ മക്രോണിന്റെ രാഷ്ട്രീയ പ്രസ്ഥാനമായ എന് മാര്ച്ചിന്റെ വിജയാഘോഷത്തിലേയ്ക്ക് അറുപത്തിനാലുകാരിയായ ബ്രിജിറ്റിന്റെ കൈപിടിച്ചാണ് മക്രോണ് എത്തിയത്.
