അമ്പലപ്പുഴ: കൈകളും കാലുകളും ഇല്ല, എന്നാല് വിധിക്കുമുന്നില് പതറാതെ അമ്പലപ്പുഴ കെ.കെ. കുഞ്ചുപിള്ള ഗവ. ഹയര് സെക്കന്ഡറി സ്കൂള് വിദ്യാര്ത്ഥി ശിവശങ്കരന് എസ്എസ്എല്സി പരീക്ഷയില് നേടിയത് തിളക്കമാര്ന്ന വിജയം.
ജന്മനാ അംഗവൈകല്യം ബാധിച്ച ശിവശങ്കരന് എട്ടു വിഷയങ്ങളില് എപ്ലസും രണ്ടെണ്ണത്തിന് എഗ്രേഡും ലഭിച്ചു. സ്കൂള് പഠനത്തോടൊപ്പം മറ്റ് വിദ്യാര്ത്ഥികള് ട്യൂഷന് സെന്ററുകളെ ആശ്രയിക്കുമ്പോഴും ശിവശങ്കരന് സ്കൂള് പഠനം കൊണ്ടുമാത്രമാണ് ഉന്നതവിജയം നേടിയത്. വിധി പരീക്ഷിക്കുന്നുവെങ്കിലും തന്റെ വിജയത്തിനു കാരണം ഈശ്വര കടാക്ഷം മാത്രമാണെന്ന് ശിവശങ്കരന് പറഞ്ഞു. ഐഎസ്ആര്ഒയില് സയന്റിസ്റ്റ് ആകുകയാണ് ലക്ഷ്യ മെന്നും ഇതിനായി പ്ലസ്ടുവിന് സയന്സ് വിഷയമെടുത്ത് പഠിക്കാനാണ് താത്പര്യമെന്നും ശിവശങ്കരന് പറയുന്നു.
വിജയം അറിഞ്ഞയുടന് ആര്എസ്എസ് പ്രവര്ത്തകര് വീട്ടിലെത്തി അനുമോദിച്ചു. അമ്പലപ്പുഴ തെക്ക് പഞ്ചായത്ത് ഇരട്ടശ്ശേരി ഷിബുകുമാറിന്റെയും അമ്പിളിയുടെയും മകനാണ്. സ്വകാര്യ സ്ഥാപനത്തില് ജീവനക്കാരനാണ് ഷിബുകുമാര്. അമ്പിളി അമ്പലപ്പുഴ സബ്രജിസ്ട്രാര് ഓഫീസിലെ ജീവനക്കാരിയാണ്. സഹോദരന് ദിവ്യജിത്ത് ചന്ദ്രകുമാര് അഞ്ചാം ക്ലാസ് വിദ്യാര്ത്ഥിയാണ്.
ശിവശങ്കരന്റെ വിജയം എല്ലാ വിദ്യാര്ത്ഥികള് ക്കും മാതൃകയാണ്. നിസ്സാര ബുദ്ധിമുട്ടുകളുടെ പേരില് പഠനത്തില് പിന്നാക്കം പോകുന്നവര് ശിവശങ്കരന്റെ ആത്മവിശ്വാസവും അര്പ്പണവും മാതൃകയാക്കണം.
