ന്യൂദല്ഹി: ചെനാബ് നദിക്കു മുകളില് ഈഫല് ടവറിനെ തോല്പ്പിക്കുകയാണ് ഇന്ത്യന് റെയില്വേ. ലോകത്തിലെ ഏറ്റവും വലിയ നദീപാലം എന്ന സവിശേഷ നേട്ടത്തിനു തുടക്കം കുറിച്ചപ്പോള് റെയില്വേ അറിയിക്കുന്നു, ഈ പാലത്തിന് ഈഫല് ഗോപുരത്തേക്കാള് 35 അടി നീളം കൂടുതലുണ്ട്.
പാലത്തിന്റെ പണി ആരംഭിച്ചു കഴിഞ്ഞു. ജമ്മുകശ്മീരിലെ കൗരി എന്ന സ്ഥലത്താണ് ചെനാബ് നദിക്കു മുകളിലൂടെയുള്ള ഈ റെക്കോഡു പാലം. നിര്മാണച്ചെലവു കണക്കാക്കുന്നത് 1100 കോടി രൂപ.
നദിയില് നിന്ന് 359 മീറ്റര് ഉയരത്തിലാണ് പാലം. 24,000 ടണ് സ്റ്റീലാണ് ഉപയോഗിക്കുന്നത്. മണിക്കൂറില് 260 കിലോമീറ്റര് വേഗതയില് ട്രെയിനിനു സഞ്ചരിക്കാന് പാകത്തിനാണ് നിര്മാണ രീതി. ബക്കലിനേയും കൗരിയേയും യോജിപ്പിക്കുന്ന പാലത്തിന്റെ ദൈര്ഘ്യം 1.3 കിലോമീറ്റര്.
ഉദ്ധംപുര്-ശ്രീനഗര്-ബാരാമുള്ള റെയില് പ്രൊജക്റ്റിലെ വളരെ നിര്ണായകമായ ഭാഗമാണിത്. ഈ പദ്ധതിയിലെ ഏറ്റവും വെല്ലുവിളി ഉയര്ത്തുന്നതും ഈ പാലത്തിന്റെ നിര്മാണമാണ്. പണി പൂര്ത്തിയാവുമ്പോള് ഇന്ത്യയിലെ എന്ജിനീയറിങ് മികവിന്റെ ഏറ്റവും മനോഹരമായ ഉദാഹരണമായി ഇതുമാറുമെന്നാണ് റെയില്വേ അവകാശപ്പെടുന്നത്.
2019ല് പൂര്ത്തിയാക്കുമെന്നാണ് പ്രതീക്ഷ. ചൈനയില് ബീപന് നദിക്കു കുറുകെ 275 മീറ്റര് നീളമുള്ള ഷുയിബൈ പാലത്തിനാണ് ഇപ്പോള് റെക്കോഡ്. രണ്ടു വര്ഷത്തിനകം ചൈനീസ് റെക്കോഡു തകരുമെന്നാണ് ഇന്ത്യന് റെയില്വേ പറയുന്നത്.
കാറ്റിന്റെ വേഗത്തിനനുസരിച്ച് ട്രെയിന് ഗതാഗതം നിയന്ത്രിക്കുന്നതടക്കമുള്ള സുരക്ഷാ ക്രമീകരണങ്ങള് സ്വീകരിച്ചിട്ടുണ്ട്. മണിക്കൂറില് 90 കിലോമീറ്ററില് ക ൂടുതല് വേഗത്തില് കാറ്റടിച്ചാല് ട്രാക്കില് ചുവപ്പു തെളിയും, ട്രെയിന് മുന്നോട്ടു നീങ്ങില്ല.
ജമ്മുകശ്മീരിലെ പ്രത്യേക സാഹചര്യം കണക്കിലെടുത്ത് സ്ഫോടനങ്ങളെ ചെറുക്കാന് പറ്റിയ 63 മില്ലീമീറ്റര് ഘനത്തിലുള്ള സ്റ്റീലാണ് ഉപയോഗിച്ചിരിക്കുന്നത്. പില്ലറുകളുടെ നിര്മാണവും സ്ഫോടനങ്ങളെ അതിജീവിക്കാന് പാകത്തിനാണ്. പാലത്തിന്റെ സുരക്ഷയ്ക്കായി ആകാശ നിരീക്ഷണ സംവിധാനമുണ്ടാവും.
